DILI, 28 abril 2022 (TATOLI)—Governu liuhosi Ministériu Administrasaun Estatál (MAE) daudaun ne’e hala’o hela preparasaun fatin ba serimónia toma pose Prezidente Repúblika eleitu, José Ramos Horta, iha Tasi-Tolu, Dili.
Xefe Departamentu Jestaun no Merkadu, Arthur Henriques, informa ho preparasaun ba serimónia pose ba PR ne’e mak Autoridade Munisipiu Dili (AMD) liuhosi Dirasaun Jestaun no Merkadu muda ona vendedór 300-resin ne’ebé hala’o negósiu iha estrada protokolu Tasi-Tolu nian hodi muda fali ba tasi-ibun.
Notísia Relevante: Governu prepara fatin serimónia toma pose ba PR eleitu atinje ona 45%
http://www.tatoli.tl/2022/04/27/governu-prepara-fatin-serimonia-toma-pose-ba-pr-eleitu-atinje-ona-45/
“Vendedór sira-ne’ebé muda sai ona iha Tasi-Tolu hamutuk 300-resin, no kuaze 200-resin mak muda ba tasi-ibun nian, balun sa’e tiha ba Tasi-Tolu no balun fila-fali ba sira-nia uma,” Xefe Departamentu Jestaun no Merkadu, Arthur Henriques, hateten ba Agência Tatoli, hafoin akompaña ekipa jestaun merkadu hasai kontetór lima (5), iha Comoro, Dili, kinta ne’e.
Atividade Autoridade Munisípiu Dili muda vendedór sira iha Tasi-Tolu ne’e, liga ba preparasaun komemorasaun 20 maiu 2022 ba dala-XX no serimóbia toma pose ba Prezidente Repúblika eleitu, nune’e Munisípiu Dili mobiliza vendedór sira-ne’ebé faan iha dalan ninin, hahú hosi estrada protokolu hosi Dirasaun Tasi-Tolu, hodi muda totál ba sira-ne’ebé faan iha trotoar leten.
“Ho atividade ne’e, ita halo atu Dili laran mós kontroladu, nune’e labele hamosu engarafamentu iha sidade laran,” nia dehan.
Maske nune’e, nia dehan, ba vendedór sira ne’e agora daudaun AMD muda hotu ona ba área tasi ibun no koloka sira tuir liña, iha klaran husik mamuk atu kareta sira bele para iha ne’ebá no parte leten iha Tasi-Tolu nian husik mamuk.
“Ami sei halo limpeza hodi hatudu katak ita-nia vizitante sira mai atu haree Timor-Leste bele moos no ukun rasik aan ne’e iha duni nia vantajen,” nia hateten.
Muda vendedór sira ba tasi-ibun tasi-Tolu nian ne’e la fó impaktu ba ambiente tanba mudansa ne’e provizóriu de’it, hodi antesipa de’it komemorasaun loron importante rua ne’e maibé aban-bainrua bainhira serimónia ramata ona mak sei haree kondisaun balun atu fó apoiu sira.
Negósiante ambulante iha Tasi-Tolu, Domingas da Costa Goncalves, hateten nia parte muda mai iha área tasi-ibun loron rua ona, ho razaun tanba hadi’a estrada no selebra loron restaursaun independénsia no serimónia toma pose ba PR eleitu, José Ramos Horta.
“Ho atividade negósiu iha tasi-ibun, ha’u sente kontente tebes tanba ha’u hetan rendimentu di’ak kompara ho fatin anterior. Ami faan iha leten, ema sosa dala ruma de’it tanba ami barak. Maibé ami faan iha ne’e, ema sosa tanba terminál próvizoriu iha ne’e. Loron ida ami bele hetan to’o $10 to’o $30 kompara ho fatin antérior, ne’ebé loron ida ami hetan másimu $15 minimu $5,” nia informa.
Maske nune’e, nia sente triste tanba fatin ne’e labele asesu ba bee-moos no sintina públiku, nuene’e husu ba Autoridade Munisípiu Dili atu haree asuntu ne’e tanba bele prejudika ba sira-nia moris nu’udar negosiante ambulante.
“Dala ruma nesesidade obriga tenke halai ba família balun ne’ebé hela besik,” nia hateten.
Entretantu, negosiante 300-resin ne’ebé Autoridade Munisípiu Dili (AMD) liuhosi Dirasaun Jestaun no Merkadu muda hosi dalan ninin Tasi-Tolu ne’e kompostu hosi negósiante ambulante sira-ne’ebé loro-loron faan sigaru, faan paun no sasán hirak sleuk tan.
Notísia Relevante: Governu aloka millaun $1,6 ba serimónia toma pose PR eleitu
Jornalista : Nelia Fernandes
Editór : Cancio Ximenes
