INSS-BNCTL sei prodús ATM ba idozu-invalidez iha Dili

DILI, 28 abríl 2022 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Loguinhos Armando Leite, hateten INSS koordena ho BNCTL sei prodús Automated Teller Machine (ATM) ba idozu no invalidéz sira iha munisípiu Dili.
“Pagamentu ba idozu no invalidéz ba faze dahuluk ita hanoin ona atu koordena ho BNCTL, nune’e prodús ATM ba idozu no invalidéz sira Dili maibé nia dura to’o tinan ida nia-laran de’it,” Loguinhos Armando Leite hateten ba Agência TATOLI, iha nia knar fatin Caicoli, Dili, kinta ne’e.
Maibé, ida-ne’e sei koordena ho Banku Nasionál Komérsiu Timor-Leste (BNCTL) atu bele fasilita no mekanizmu hodi hapara ATM ba tinan ida-nian mak oinsá.
“Ita halo ida-ne’e tanba ita hatene katak bainhira ferik-katuas sira foti sira-nia osan mak loron ruma nia mate tiha, entaun oan no bei-oan mak sei foti fali. Nune’e ami lakohi ida-ne’e akontese tanba regra legál ne’ebé iha katak ita fó subsídiu idozu no invalidez de’it,” nia dehan.
Polítika BNCTL atu prodús AMT ne’e, sei akontese de’it iha Dili tanba ATM seidauk eziste iha postu administrativu sira iha territóriu nasionál, maibé ba sira-ne’ebé mak iha ona ATM bele utiliza.
“Ami ko’alia ho lai BNCTL tanba ninia mekanizmu atu hapara ka blokir ATM hodi vale de’it iha tinan ida-nian,” nia hateten.
Atu prodús ATM ne’e, ho objetivu atu bele fasilita ferik ho katuas sira bainhira simu osan tanba sira tenke forma kle’ur, entaun dalaruma halo sira kolen no balun bele hetan moras fila-fali.
Banku Nasionál Komérsiu Timor-Leste (BNCTL) prodús ona ATM ba klienta sira iha territóriu Timor-Leste hamutuk unidade 68.
Notísia Relevante: COVID-19 aumenta, INSS-BNCTL sei prodús ATM ba idozu sira
Jornalista : Osória Marques
Editór : Cancio Ximenes

