Ekipa konjunta halo operasaun ba karreta Estadu iha instituisaun rua

DILI, 29 abril 2022 (TATOLI)—Ekipa Konjunta hosi Komisaun Funsaun Públika (KFP), Komisaun Antí-Korrupsaun (CAC, sigla portugés), Patrimóniu Estadu, Diresaun Nasionál Transporte Terrestre (DNTT), Polísia Nasionál Timor-Leste (PNTL) liuhosi Unidade Polísia Tránzitu halo operasaun konjunta ba karreta Estadu.
Pontu Vogál Operasaun CAC, Euclides Madeira, hateten, objetivu operasaun konjunta ne’e atu haree ba Rezolusaun Governu 130/2021, dekretu-lei númeru 21/2021 kona-ba subsídiu transporte ne’ebé aloka ona ba diresaun kargu xefia sira iha entidade Estadu, ne’ebé funsionáriu to’o kargu xefia laiha autorizasaun uza karreta, maibé iha de’it karreta operasaun ba diresaun xefia.
“Ita halo operasaun ba karreta ne’ebé ita identifika iha ministériu ruma hanesan Ministériu Agrikultura no Peska (MAP) no Ministériu Administrasaun Estatál (MAE). Tuir alvu, loloos ohin ita-nia ekipa konjunta atu foti karreta hamutuk tolu tanba antes ne’e halo ona observasaun dadus kompletu atu sai patrimóniu Estadu, maibé ohin konsege foti ida de’it, enkuantu rua seluk ita sei rekolla. Tanba karreta balu sei halo viajen ba munisípiu,” Pontu Vogál CAC hateten iha salaun Patrimóniu Estadu, Balide, sesta.
Notísia relevante: MF rejista veíkulu Estadu 3.415
Operasaun konjunta ne’e realiza tanba haree kargu xefia balun la kumpre rezolusaun, entaun ekipa konjunta foti karreta sira tanba iha rezolusaun ne’e hateten, fiskalizasaun ba rezolusaun ne’e nafatin kabe ba ekipa konjuta ninia responsabilidade.
“Karreta rua seluk ne’ebé ohin ekipa konjuta seidauk foti, sei halo xamada ba ema ne’ebé lori karreta, nia fila orsida hosi manatuto mai sei mai entrega karreta ne’e ba patrimóniu Estadu atu kumpre rezolusaun Governu 130 nian,” nia akresenta.
Iha rezolusaun ne’e la temi sansaun ba hirak ne’ebé viola rezolusaun ne’e, maibé sei iha prosesu kriminal.
“Ekipa konjunta sei prodús relatóriu no hosi ne’ebá mak sei haree, tanba kontíudu hosi relatóriu mak indika, sera que iha indísiu ba krime ka lae, karik iha ita tenke prosesa tuir lei 7/2020, kona-ba medida prevensaun no kombate korrupsaun nian, liuliu kona-ba artigu pekulatu uzu ninian,” nia dehan.
Jornalista : Arminda Fonseca
Editora : Julia Chatarina

