Bainaka 2.500-resin sei partisipa serimónia fó pose ba Ramos Horta
DILI, 03 maiu (TATOLI)—Vise Sekretáriu Jerál Ministériu Administrasaun Estatál (MAE), Belarmino Filomeno Neves, hateten preparasaun ba serimónia tomada pose Prezidente eleitu (2022-2027), José Ramos Horta, iha loron 19 maiu no komemorasaun loron restaurasaun independénsia ba dala-XX iha 20 ne’e maiu atinje ona 60%.
Notísia Relevante: Governu aloka millaun $1,6 ba serimónia toma pose PR eleitu
Nia informa, iha bainaka espesiál, líder mundiál hosi nasionál no internasionál hamutuk 2.500-resin mak sei partisipa serimónia tomada pose ba Prezidente Republika eleitu.
“Bainaka ne’ebé atu partisipa iha serimónia tomada pose ba Ramos Horta ne’e, tantu nasionál no internasionál, hamutuk 2.500. Ita-nia preparasaun ba tomada pose no selebrasaun 20 maiu tinan ne’e, atinje 60%,” Belarmino Filomeno Neves hateten ba Agência TATOLI, iha salaun Delta Nova, Comoro, Dili, tersa ne’e.
Hosi 60% ne’e, Komisaun Organizadora prepra hotu ona tenda ba konvidadu baibain, verry important person (VIP) no very very important person (VVIP) iha Tasitolu no hein atu monta de’it, maibé sasán hirak-ne’e kompleta hotu ona ho sanitária tantu nasionál no internasionál inklui estrada aat sira iha Tasi-Tolu hadi’a hotu ona.
Entretantu, nia dehan, selebrasaun loron retaurasaun independénsia ba dala-XX 20 maiu ne’e foti tema “Liuhosi Comemoração Vinte Anos Da Restauração da Independência, Mai Ita Hametin Pás ho Estabilidade hodi Desenvolve Ita-Nia Rai Timor-Leste”.
Foti tema prinsipál ida-ne’e, atu mantein nafatin estabilidade no unidade nune’e bele lori dezenvolvimentu nasionál ba povu tomak hodi bele sente Timor-Leste nia independénsia ne’ebé halo ona tinan 20 ne’e.
“Ita foti tema ne’e atu mantein nafatin ita-nia estabilidade, paz no unidade para oinsá lori desenvolvimentu tanba ita restaura ita-nia independénsia ne’e ba tinan 20 ona ne’ebé tenke iha desenvolvimentu, nune’e para povu sente ukun an ne’e nia benefísiu. Aleinde ida-ne’e tanba tema ne’e hetan aprovadu hosi Konsellu Ministru,” nia hateten.
Notísia Relevante: PM: Governu hala’o hela preparasaun ba serimónia toma pose PR eleitu
Jornalista : Osória Marques
Editór : Cancio Ximenes
