DILI, 11 maiu 2022 (TATOLI)–Ministériu Finansa (MF) liuhosi Sekretariadu Tékniku Fundu COVID-19, realiza ona pagamentu liña frente jornalista hamutuk benefisiáriu 409 ho totál $285.995, ne’ebé presta servisu iha ámbitu prevensaun no mitigasaun COVID-19 iha Timor-Leste.
“Pagamentu ne’e ba períodu fulan-ualu, hahú hosi abril to’o novembru 2021, durante Estadu Emerjénsia,” refere nota ne’ebé Agência Tatoli asesu hosi Gabinete MF, kuarta ne’e.
Pedidu pagamentu ne’ebé submete hosi Ministériu Asuntu Parlamentár no Komunikasaun Sosiál (MAPKOMS) liu ona prosesu verifikasaun no dadus hirak ne’ebé submete mai Sekretariadu Tékniku Fundu COVID-19, ne’ebé prienxe ona rekezitu legál tuir Dekretu-Lei númeru 1/2022, 05 janeiru kona-ba subsídiu ba profisionál ne’ebé hala’o atividade jornalístika, hodi fornese produtu jornalístiku mitiga COVID-19.
Antes ne’e, iha tinan 2020, Sekretariadu Tékniku Fundu COVID-19 realiza ona pagamentu suplementu remuneratóriu liña frente jornalista sira ba 216 benefisiáriu ho montante $97.425 ba períodu fulan-tolu.
Lista jornalista iha tinan 2021 sa’e ba benefisiáriu 409, kompara ho tinan 2020 iha de’it benefisiáriu 216, signifika iha aumente kuaze besik 90%.
Notísia relevante: PN husu MAPKOMS aselera subsídiu ba jornalista liña frente
Bazeia ba Dekretu-Lei númeru 1/2022, 05 janeiru ne’e, iha loron 24 marsu 2022, MAPKOMS submete pedidu pagamentu mai Sekretariadu Tékniku Fundu COVID-19, ne’ebé ba lista dahuluk kompostu hosi jornalista instituisaun mídia oioin ho totál 288, ne’ebé benefisiáriu indika mós fatin ba halo kobertura no lista ne’e hetan aprovasaun hosi MAPKOMS liuhosi despaixu númeru 01/MAPKOMS/I/2022.
Tanba lista ne’e iha duplikasaun no balun konta bánkaria benefisiáriu la loos, nune’e Ministériu Finansa devolve filafali ba MAPKOMS hodi hadi’a.
Nune’e, iha 28 marsu 2022, MAPKOMS submete filafali lista jornalista sira ba MF atubele prosesa, ne’ebé iha lista daruak ne’e kompostu hosi jornalista instituisaun mídia oioin, ho totál benefisiáriu 507 no totál orsamentu hamutuk $371.400.
Maibé lista daruak ne’e la indika fatin ba halo kobertura no laiha despaixu aprovasaun hosi MAPKOMS no lista daruak mai ho benefisiáriu 507, tanba ne’e hadi’a filafali.
Bazeia ba dispozisaun legál ne’ebé iha, Gabinete Apoiu Jurídiku konklui katak pagamentu subsídiu ba profisionál ne’ebé dezenvolve atividade jornalístika ne’ebé solisita hosi Governu hodi fornese notísia kona-ba COVID-19 durante Estadu Emerjénsia bele de’it atribui bainhira iha despaixu aprovasaun ba lista profisionál ne’ebé dezenvolve atividade jornalístika hosi MAPKOMS, ho baze ba informasaun ne’ebé fornese hosi Sala Situasaun Sentru Nasionál Jestaun Krize (CIGC, sigla portugés) ka hosi Diresaun Nasionál ba Diseminasaun Informasaun MAPKOMS, konforme númeru 3 artigu 2 Dekretu-Lei númeru 1/2022, 05 janeiru.
Iha númeru 1 artigu 2, diploma ne’e, estabelese katak ba profisionál ne’ebé dezenvolve atividade jornalístika hamutuk ho Sala Situasaun Sentru CIGC ka ida ne’ebé Governu husu hodi prodús notísia durante períodu 01 abril to’o 31 dezembru 2021, sei atribui subsídiu pekuniáriu ba kada loron servisu efetivu benefisiáriu nian iha kondisaun direta expozisaun ba vírus SARS-Cov2 durante deklarasaun períodu Estadu Emerjénsia.
Iha númeru 2 artigu 2, diploma ne’e, subsídiu refere anteriormente iha valór $5 ba kada loron servisu efetivu, nune’e konforme númeru 3 artigu 2, diploma refere, subsídiu ida ne’e bele de’it atribui bainhira iha despaixu aprovasaun lista ba profisionál ne’ebé dezenvolve atividade jornalístika hosi Ministru MAPKOMS ho baze ba informasaun ne’ebé fornese hosi Sala Situasaun SIGC ka hosi Diresaun Nasionál ba Diseminasaun Informasaun MAPKOMS.
Jornalista : Antónia Gusmão
Editora : Julia Chatarina
