DILI, 17 juñu 2022 (TATOLI)—Xefe Interinu Sentru Saúde Comoro, Constáncio Barreto, informa, hahú hosi janeiru too maiu, rejista moras Infesaun Vias Respiratóriu (ISPA) hamutuk 35.977.
“Ami rejista Infesaun Vias Respiratóriu (ISPA) ma kaas liu hamutuk 35.97, tuir fali mak moras diárea 6.002 no moras kulit hamutuk 5.545,” Xefe Interinu ne’e hateten ba Agência TATOLI iha knar fatin-Dili, sesta ne’e.
Kazu Infesaun Vias Respiratóriu (ISPA) no diárea maioria afeta hosi labarik sira ho idade tinan 15 mai-kraik.
“Moras hirak ne’e mosu tanba kauza hosi klíma ne’ebé daudaun udan monu rai no derepente para. Nune’e husu komunidade sira atu nafatin uza mascara no fase liman inklui evita fuma atu hadook an hosi moras hirak ne’e,” resposavél ne’e sujere.
Alende ne’e, Sentru saúde Comoro mós rejista tmoras Pneumonia, ma nutrisaun, asidente tráfegu, no inklui kazu violasaun hamutuk 59.375.
“To’o agora ita-nia ekipamentu médiku kona-bá aimoruk sufisiente hela atu atende ba pasiente sira ne’ebé mak mai halo tratamentu saúde iha ne’e,” nia afirma.
Jornalista : Felicidade Ximenes
Editór : Florencio Miranda Ximenes
