iklan

HEADLINE, MUNISÍPIU, VIQUEQUE

Autoridade hato’o proposta ba MAE aumenta suku tolu iha Macadique

Autoridade hato’o proposta ba MAE aumenta suku tolu iha Macadique

Xefe suku Macadique, Afonso dos Reis, observa prosesu reabilitasaun sede suku, sesta (25/06). Imajen Tatoli/Vitorino Lopes da Costa

VIQUEQUE, 24 juñu 2022 (TATOLI)—Autoridade suku Macadique, postu adiministrativu Uatulari, munisípiu Viqueque hato’o proposta ba Ministériu Administrasaun Estatál (MAE) atu aumenta suku tolu tanba populasaun barak liu.

“Ami  planu hakarak suku Macadique aumenta ba suku tolu, ami-nia  proposta hato’o ona ba MAE tanba sira maka bele deside no tetu ami-nia proposta.  Ami-nia populasaun ho númeru boot, ho razaun sira-ne’e maka motiva ami hakarak tau tan suku tolu hodi habelar prosesu dezenvolvimentu ba komunidade sira-nia le’et. Bainhira nafatin mantein ho suku ida de’it, populasaun barak no dezenvolvimentu susar,” Xefe suku Macadique, Afonso dos Reis, informa ba Agência Tatoli, iha suku Macadique, sesta ne’e.

Notísia relevante: Natar ektare 200 iha Macadique abandonadu

Tuir Afonso dos Reis, razaun seluk atu aumenta suku hodi komunidade bele sai benefisiáriu ba programa Governu hanesan Uma Kbiit Laek (UKL) no seluk tan.

“Ami submete hotu ona dadus forma suku tolu ba ministériu relevante no posibilidade suku Macadique bele susesu. Ami mós simu ona informasaun hosi ministériu katak suku Macadique iha posiblidade bele forma suku tolu. Ami la ezije ministériu, maibé ami-nia pedidu bá ona meza ministériu hodi foti dezisaun ba ami-nia pedidu, nune’e bele realiza iha tinan 2023,” nia tenik.

Suku Macadique sei fahe ba Macadique de Cima, Macadique de Baixo no Macadique-Uaitame, ne’ebé suku ida kompostu hosi aldeia neen, seluk hitu no ida tan ualu.

“Ami fahe ona suku  rua iha parte tasi. Ami tau iha Debu-isi iha foho baliza entre postu Quelecai no postu Ossu,” nia akresenta.

Nune’e, kolokasaun populasaun ba suku sira loos hotu ona no populasaun sira hein de’it bainhira maka MAE bele deside suku Macadique ninia pedidu.

Suku Macadique ho totál aldeia hamutuk 21, kompostu hosi Edemumo, Kaidaualata, Gomi-Uro, Macadique, Kaidaualari, Namanei, Bubulaku, Liacaiua, Betulari, Lutugia, Daralari, Lacarate, Lau-Uma, Ossolari, Koquilako, Mata-Dalan, Queturai, Luru-Boru, Boru-Bai, Digamasi no Bubulita.

Suku ne’e ho totál populasaun 7.482 hosi uma-kain hamutuk 1.773, kompostu hosi mane 3.852 no feto 3.630.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!