iklan

HEADLINE, MUNISÍPIU, VIQUEQUE

Levantamentu dadus identifika uma 103 afetadu projetu LNG iha Beaço

Levantamentu dadus identifika uma 103 afetadu projetu LNG iha Beaço

Xefe suku Maluro, Francisco Amaral. Imajen Tatoli/Vitorino Lopes da Costa

VIQUEQUE, 24 juñu 2022 (TATOLI)–Xefe suku Maluro, postu administrativu Viqueque vila, Francisco Amaral, informa, progresu levantamentu dadus rai no propriedade hosi ekipa liña ministeriál identifika ona uma hamutuk 103 afetadu Likuifetu Naturál Gas  (LNG) iha Beaço.

“Ita-nia ekipa ohin halo levantamentu rai no propriedade sira iha suku Maluro tama ona loron datoluk, ne’ebé identifika uma afetadu iha ba projetu LNG Beaço hamutuk 103,” Autoridade suku hateten ba Agência Tatoli, iha suku Maluro, sesta ne’e.

Tuir Xefe suku, atividade la’o ho di’ak tanba komunidade afetadu sira koopera ho di’ak ho ekipa levantamentu hosi liña miministeriál.

Estadu Timor-Leste hamutuk ho komunidade Beaço iha kompromisu hodi garantia interese nasionál  atu dada kadoras mai Timor-Leste no tuir  estudu tékniku no komersiál lubuk ida ne’ebé maka halo ona iha tinan hirak liubá iha área dezignadu planta LNG Beaço.

Antes ne’e, VIII Governu Konstitusional liuhosi Ministériu Petróleu no Minerál (MPM) no Timor Gas no Petróleu (Timor GAP, E.P) halo ona diálogu ho komunidade Beaço.  

Notísia relevante: MPM husu komunidade Beaço kolabora ho ekipa levantamentu dadus ba projetu LNG

Nune’e, iha dezembru 2021 no janeiru 2022, komunidade Beaço ho konsiénsia rasik halo akta deklarasaun hodi entrega rai dezignadu ba Governu hodi harii planta LNG iha Beaço.

Tuir planu, ekipa responsável sei kontinua halo levantamentu dadus rai no propriedade ektare  574 iha suku Maluro, Beaço no atividade levantamentu fahe ba faze rua, ne’ebé faze dahuluk sei hala’o iha loron 22 juñu to’o 05 jullu 2022 no faze daruak sei  hahú iha  loron 21 jullu to’o 03 agusto 2022, ikus mai sei halo publikasaun iha outubru 2022.

Ekipa levantamentu rai no propriedade hamutuk 11 kompostu hosi task force, terra no propriedade no seluk tan, ho totál pesoál ne’ebé envolve iha prosesu ne’e hamutuk na’in-77, ne’ebé durante prosesu hetan seguransa hosi Polísia Nasionál Timor-Leste (PNTL) munisípiu Viqueque.

Jornalista  : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!