iklan

DILI, POLÍTIKA

Bankada FRETILIN-KHUNTO-PD husu Governu fó asisténsia ba traballadór na’in-hitu iha Dubai

Bankada FRETILIN-KHUNTO-PD husu Governu fó asisténsia ba traballadór na’in-hitu iha Dubai

Membru PN hosi Bankada FRETILIN, Antoninho Bianco.

DILI, 27 juñu 2022 (TATOLI)—Deputadu hosi bankada FRETILIN, Partidu Demokrátiku (PD) ho KHUNTO iha Parlamentu Nasionál (PN) husu Governu atu fó asisténsia ba traballadór timo-oan feto na’in-hitu (7) ne’ebé daudaun ne’e terus no hela iha Dubai, Uni Emeradu Arabé (UEA).

Notísia Relevante: Governu sei solusiona traballadór timoroan na’in-hitu “terus” hela iha Dubai

Vise Bankada Fretilin, Antoninho Bianco, hateten Estadu iha papél atu proteje nia sidadaunsira  iha rai-laran no rai-li’ur.

“Bankada FRETILIN sempre defende ema ida labele sai vítima hodi ema ida no ema balun ninia aktu. Tanba ne’e, ita agradese deteta duni ema na’in-hitu ne’ebé públiku hotu hatene no ema ne’ebé autór hetan ona detensaun hodi hein prosesu investigasaun bele hatene kle’an liu tan rede, nune’e tempu oin mai labele akontese tan. Tanba ne’e,  Estadu presiza nafatin proteje nia sidadaun,” Deputadu Antoninho Bianco hateten ba Agência Tatoli iha Parlamentu Nasionál, segunda ne’e.

Tanba ne’e, nia husu ba parte ezekutivu oinsá tau atensaun hodi labele repete tan situasaun hanesan iha tempu tuir mai.

“Dalabarak fó hatene ona no ema balun sai ne’e depois sai tiha mak foin deteta vítima, entaun vítima fó sai fali nune’e presiza haree,” nia jhateten.

Notísia Relevante: PR Horta husu Governu repatria timor-oan na’in-hitu hosi Dubai

Deputadu Partidu Demokrátiku, Adriano do Nascimento. Imajen António Goncalves

Deputadu PD, Adriano Nascimento, husu Governu tenke koordena ho Governu Dubai hodi buka dalan se kazu ne’e tama ona, tanba krime prosesu legál ninian mak Governu tenke fó asisténsia no ida seluk Governu oinsá buka dalan lori fila sira ba fatin ne’ebé sira hakarak ba.

“Governu tenke fó asisténsia legál tau rekursu saida de’it labele husik de’it hanesan ne’e, bainhira timor-oan sira ne’e hasoru problema,” nia hateten.

Deputadu hosi bankada opozisaun ne’e triste haree grupu organizadu ne’ebé deskonfia kria rede hodi haruka traballadór timoroan sai suspeita ba tráfiku umanu.

“Ida-ne’e tristeza se timoroan monu ba emainia lasu liu-liu atividade tráfiku umanu ninian ne’ebé lori sira ba iha ne’eba, depois hosik hela hanesan ne’e. Hanoin problema ida ba ita-nia nasaun, tanba ne’e Governu tenke haree kestaun ne’e liu-liu grupu organizadu sira-ne’ebé halo hela atividade ida-ne’e hodi lori sai timoroan ba rai-li’ur,” nia preokupa.

Reprezentante povu ne’e apresia servisu Polísia siéntifika Investigasaun Kriminál (PCIC, sigla portugés) ne’ebé detein ona autór balun ne’ebé signifika sira servisu hatudu ona rezultadu maibé presiza reforsa tan servisu intelijensia nian hosi PSIC no imigrasaun tanba ema sira-ne’e ba tiha ona rai-li’ur mak foin PCIC identifika.

Iha parte seluk, Deputadu Adriano husu Governu tenke halo koordenasaun ho ministéiru relevante atu kontrola timoroan sira liu-liu hirak ne’ebé sai atu ba buka servisu iha rai-li’ur ho objetivu tenke klaru.

Tanba Kondisaun iha rai-laran kampu traballu la bele absorve ema hotu, entaun ho nesesidade ne’e sidadaun sira tenke ba li’ur, nune’e grupu krime organizadu sira komesa explora.

“Entaun kada timoroan atu sai ba servisu iha rai-li’ur Governu tenke kria mekanizmu ruma hodi haree molok sai. Se mak sponsor no atu ba ne’ebé. Bele uza mós imigrasaun nasaun seluk, to’o iha ne’eba timoroan sira mai ho objetivu atu buka servisu, hodi nune’e labele hetan ho situasaun sira hanesan ne’e,” nia fó hanoin

Tanba timor-oan sira ba iha ne’eba atu ajuda ekonomia família no nasaun, nune’e bainhira Governu la fasilita entaun grupu organizadu lori sira ba iha buat ne’ebé ema hotu la espera.

Iha fatin hanesan, Deputadu KHUNTO no Atuál Vise Prezidente Parlamentu Nasionál, Luis Roberto, husu embaixada Timor-Leste iha rai-li’ur ne’ebé destaka atu oinsá bele akompaña besik ba traballadór na’in-hitu ne’ebé terus no daudaun hela iha Dubai.

Notísia Relevante: Timoroan na’in-hitu “terus” hela iha Dubai

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!