DILI, 27 juñu 2022 (TATOLI)— Hahú janeiru too horisehik, Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, rejista pasiente dengue hamutuk 5.264, hosi númeru ne’e labarik na’in-57 mak mate.
“Situasaun kazu dengue iha Timor-Leste hosi janeiru mai too horiseik hamutuk kazu 5.264 no kumulativu óbitu na’in 57,” refere nota ne’ebé Agência TATOLI asesu, segunda ne’e.
Maioria kazu ne’e deteta husi Munisípiu Dili ho totál 3.597, Baucau 331, Manatuto 176, Covalima 149, Ermera ho kazu 118, Manufahi 213, Viqueque 83, Ainaro 45, Liquiça 164, Aileu 85, Bobonaro 58, Lautem 165 no Rejiaun Administrativu Espesiál Oé-Cusse no Ambeno (RAEOA) na’in-neen.
Munisípiu Dili nafatin rejista kazu ne’ebe a’as iha fulan juñu 2022, ho totál kazu 3.671, kompostu hosi postu administrativu Dom-Alexo iha kazu 2.206, Cristo-Rei 542, Vera-Cruz 405 no Nain-Feto 444.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 636, Klínika Fatumeta 308, Sentru Saúde Comoro 1.392, Sentru Saúde Vera-Cruz 253, sentru Saúde Formoza 689, sentru saúde Becora 264, Klínika Moris Foun ida, Sentru saúde Atauro 12, sentru saúde Metinaro 50, Klínika Bairru-Pité 60 no Klínika Motael na’in-tolu.
MS apela ba komunidade
Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu hosi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dala-ida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: Surtu dengue: óbitu na’in-56 no pasiente dengue sa’e ba 4.930
Jornalista : Felicidade Ximenes
Editór : Florencio Miranda Ximenes
