iklan

KAPITÁL, NASIONÁL

Atensaun! Estudante soe lixu arbiru, Governu la tau matan ba jardin

Atensaun! Estudante soe lixu arbiru, Governu la tau matan ba jardin

Ambiente Jardin 05 de Maio Colmera, Dili, tersa (27/06). Imajen Tatoli/Francisco Sony.

DILI, 30 juñu 2022 (TATOLI)—Iha dadeersan loromatan sa’e to’o loromatan monu no subar-an, bainhira la’o liuhosi área Lecidere no Colmera nian, jardin 05 de Maio, Largo Lecidere no jardin Prezidente BJ Habibie, sai hanesan leet verde ida-ne’ebé sai fatin ba ema atu halibur malu hodi kasu sira-nia kolen tomak.

Notísia Relevante: Governu husu komunidade soe lixu tuir oráriu

Jardin, haree hosi funsaun ekolojia, fatin ne’e sai hanesan pulmaun ba sidade ida-nian ne’ebé ai-hun sira iha laran ne’e bele halibur anin no bele fó anin nalirin ba ema, no sai hanesan filtru ida hodi ta’is no hamenus polusaun hosi karreta no motor.

Haree hosi funsaun sosiál, jardin mak sai hanesan fatin halimar, fatin desportu no fatin ba ema (estudante sira) atu halo interasaun ba malu.

Tanba sai hanesan fatin ba ema atu halo interasaun, to’o jardin hirak ne’e nia oin sai malahok no la furak iha vizitante balun nia matan. Tanba, hafoin halimar iha jardin laran—ezersísiu—debate no fila-liman (faan sasán) iha jardin laran, vizitante barak mak lakon konsiénsia hodi soe lixu arbiru, halo ema barak preokupa tanba lixu lekar ba-mai de’it.

Xefe Departamentu Saneamentu Munisípiu Dili, Domingos Soriano, hateten lixu ne’ebé lekar iha jardin laran ka iha fatin públiku sira ne’e dala ruma estudante sira ne’ebé la’o iha dalan públiku no estuda ka halo sira-nia traballu de kaza iha jardin laran ne’e mak kontribui makaas hodi soe lixu arbiru.

Ambiente Jardin 05 de Maiu Colmera, Dili, tersa (27/06). Imajen Tatoli/Francisco Sony.

“Ita-nia estudante sira bainhira halo sira-nia trabllu iha jardin, sira han ne’e so’e hela iha ne’ebá. Ida-ne’e sai preokupasaun boot liu, entaun ita tenke fó atensaun ba estudante sira-ne’e. Se ita hakarak sidade Dili moos no matak, ida-ne’e husu ba estudante no komunidade tenke tau konsiénsia ne’ebé aas, atu nune’e Dili moos hosi lixu. Se ho konsiénsia ne’ebé laiha, hotu-hotu bele ko’alia sidade Dili nakonu ho lixu hela de’it,” Domingos Soriano hateten ba Agência Tatoli, iha nia knar fatin, Dili. 

Komunidade labele preokupa katak iha sidade Dili ne’e lixu namkari iha fatin-fatin, maibé komunidade mós tenke hatene katak lixu ne’e la mai hosi Governu maibé komunidade mak soe lixu arbiru.

“Iha munisípiu Dili ne’e lixu lekar iha jardin no iha fatin-fatin ne’e la’ós mai hosi Governu maibé maihosi komunidade. Se lixu mai hosi Governu mak komunidade krítika katak Díli nakonu ho lixu, ah, ida-ne’e loos. Maibé, komunidade mak so’e lixu arbiru, entaun ida-ne’e fila-fali ba komunidade nia konsiénsia,” Domingos Soriano hateten.

Nune’e, tuir nia, soe lixu arbiru ne’e atitude ida-ne’ebé ladún di’ak no labele sai modelu atu ema seluk halo tuir tanba hahalok hosi komunidade ne’ebé mak soe lixu arbiru de’it ne’e mak sei halo sidade Dili sai sidade ida-ne’ebé identiku ho lixu.

“Tanba saida ita-nia sidade nakonu ho lixu. Tanba komunidade han so’e, hemu so’e no fuma so’e ba fatin arbiru de’it. Bainhira ema ba halimar, halo ezesrsísiu, fila-liman no halo interasaun iha jardin ne’e, dala barak sira haluha hodi soe lixu iha lixeira,” nia dehan.

Governu presiza tau regra iha jardin kapitál Dili

Entretantu, iha Jardin Largo Lecidere no Jardin 05 de Maio, la’ós de’it sai ba vizitante sira soe lixu arbiru maibé sai mós fatin ba ema joga karta, halimar bingo no iha ema balun hemu tua manas iha jardin laran, entaun ida-ne’e sai mós estudante sira-nia preokupasaun.

Estudante hosi Universidade Nasionál Timor Lorosa’e (UNTL), Melita Dina da Costa, ne’e vizita no halo atividade traballu de kaza iha Jardin 05 de Maio ne’e preokupa no husu Governu liuhosi Autoridade Munisípiu Dili (AMD) atu tau regra iha jardin kapitál Dili, nune’e jardin hirak ne’e bele moos no saudavél.

Ambiente Jardin 05 de Maiu Colmera, Dili, tersa (27/06). Imajen Tatoli/Francisco Sony.

“Tuir ami estudante nia haree fatin jardin sira, liu-liu Jardin 05 de Maio, ita mai tuur referesing no halo kontante an, nune’e ba ami estudante karik mai iha ne’e atu estuda. Maibé agora ida-ne’e, la’e. Realidade komunidade balun mai iha ne’e joga fali karta no sira han buat ruma lixu la tau iha nia fatin. Entaun, ho buat sira-ne’e orsida ema estranjeiru sira kuandu la’o halimar mai iha jardin sira, haree buat sira ne’e katak Governu la tau matan ba jardin. Tanba ne’e, Governu presiza tau regra ka tau liafuan ruma iha jardin sira, atu nune’e komunidade ne’e labele mai joga karta iha ne’e no mós so’e lixu iha nia fatin,” Melita Dina da Costa hateten ba Agência Tatoli, iha Jardin 05 de Maio, Dili.

Aleinde ne’e, nia mós husu atu pesoal seguransa sira-ne’ebé Governu koloka ona iha jardin sira atu tau matan, nune’e komunidade sira labele joga no so’e lixu iha nia fatin, atu nune’e ema hareee jardin iha kapitál Dili sai jardin ne’ebé moos no furak iha ema seluk nia matan.

Notísia Relevante: AMD sei fó koima ba infratór sira-ne’ebé soe lixu arbiru

Estudante Universidade Nasionál Timor-Lorosa’e, (UNTL), Leo da Costa, sente triste ho hahalok hosi estudante sira soe lixu arbiru iha jardin laran no komunidade balun uza espasu jardin nian hodi joga karta no hemu tua manas.

“Hanesan Estudante sente triste tebes haree ba estudante komunidade ne’ebé la hatene utiliza fatin ka jardin sira. Tanba jardin sira ita mai tuur hanesan fatin refresing, la’ós mai joga fali karta iha ne’e. Nune’e, mós ita haree jardin sira foer no lixu la tau iha nia fatin. Tanba, ita hatene katak, bainhira ita han ka hemu, lixu la tau iha nia fatin no ida-ne’e mós bele fó impaktu ba ita-nia saúde no ambiente. Tanba ne’e, Governu presiza haree ka fó regra, liu-liu ba sira-ne’ebé joga fali karta iha jardin laran, nune’e bele prevene,” nia dehan.

Nune’e mós, nia husu ba Governu liuhosi Autoridade Munisípiu Dili liu-liu ekipa saneamentu presiza koloka jardineiru no ema hamoos-na’in sira hodi bele haree no hamoos lixu sira-ne’e, nune’e jardin sira-ne’e bele buras no matak netik.

Ambiente Jardin 05 de Maiu Colmera, Dili, tersa (27/06). Imajen Tatoli/Francisco Sony.

“Se lae, ita haree, Governu harii jardin maibé jardin ne’e hanesan fatin fuik na’in laek. Ezemplu, vazu sira iha jardi ne’e la’ós ai-funan mak ku da ba laran maibé du’ut fuik sira mak moris fali iha laran, tanba laiha jardineiru no ema hamoos-na’in sira-ne’e atu haree no hamoos. Ita haree jardin sira-ne’e hanesan na’in laek. Entaun, husu ba Autoridade Munisípiu Dili atu bele tau matan ba jardin sira iha kapitál Dili ne’e,” nia dehan.

Entretantu Alumnu UNTL, Inocensio da Crúz Ximenes, sente triste bainhira nia parte haree fatin turizmu sira iha kapitál Dili hanesan Cristo rei iha Fatucama no Estatúa Amo Papa João Paulo II iha laletek Tasi-Tolu ne’eba ne’e, sai hanesan fatin lixu atu ema soe lixu.

“Nu’udar timor-oan rekomenda ba parte kompotente liu-liu halo servisu ba ida-ne’e, bele haree mós ba ita-nia fatin sira-ne’e tanba fatin ne’e iha kedas fatin públiku. Orsida ema estranjeiru sira mai haree fatin ne’e, orsida sira fila-fali ba sira-nia rai, katak Timor falta kontrolu no ema soe lixu arbiru de’it,” nia dehan.

Entretantu, tuir observasaun Ajénsia Tatoli iha terrenu nota katak jardin sira iha kapitál Dili liu-liu iha Jardin 05 de Maiu, Jardin Motael, Largo Lecidere no Jardin Prezidente BJ Habibie ne’e, lixu sira soe arbiru de’it.

Aleinde ne’e, iha Jardin Largo Lecidere ne’ebé iha loos tasi ibun Lecidere ne’e, lixu lekar ba-mai no ekipa saneamentu Dili mós karik haluha raut lixu, entaun no nuu-kulit sira-ne’ebé vendedór ambulante sira la soe tama ba lixeira ne’e husik lekar iha rai, nune’e halo jardin ne’e la saudavé no la furak iha ema-nia matan.

Notísia Relevante: Governu rekruta pesoál 34 hamoos lixu iha kapitál Dili

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!