iklan

HEADLINE, MUNISÍPIU, VIQUEQUE

Uma-kain 30 iha suku Afalokai Viqueque afetadu inundasaun

Uma-kain 30 iha suku Afalokai Viqueque afetadu inundasaun

Xefe suku Afaloikai, Constantinho Guterres> Imajen Tatoli Vitorino Lopes da Costa

VIQUEQUE, 30  juñu 2022 (TATOLI)–Udan-boot desde kuarta (29/06) kalan to’o dadeer iha parte leste rezulta mota Bebui sa’e, nune’e uma-kain 30 iha aldeia Lari no Ossokaiua, suku Afalokai, postu administrativu Uatulari, munisípiu Viqueque afetadu ba akontesimentu ne’e.

“Dadus provizóriu komunidade afetadu ba inundasaun hosi aldeia Lari hamutuk uma-kain 20 no Ossokaiua uma-kain 10 ne’ebé daudaun ne’e evakua sai ba fatin seguru,” Xefe suku Afalokai, Constantinho Guterres, hateten ba Agência Tatoli via telefónika, kinta ne’e.

Notísia relevante: Aldeia rua iha suku Afaloikai Viqueque ho inisiativa loke dalan

Tuir autoridade lokál ne’e, nia parte sei hein dadus dezastre naturál ikus hosi xefe aldeia suku rua.

“Komunidade hosi aldeia rua ne’e besik liu mota Bebui, ne’ebé nia bee mota horikalan sa’e boot, entaun tama hotu ba komunidade sira-nian uma. Nune’e mós iha aldeia Dasu-Uati no Buibela fó ona sinál rai halai,” nia akresenta.

Daudaun ne’e xefe suku hamutuk ho xefe aldeia sira kontinua rekolla informasaun kona-ba kondisaun afetadu sira iha suku Afaloikai laran.

Administradór postu Uatucarbau, Alfredo dos Santos. Imajen Tatoli/Vitorino Lopes da Costa

Iha fatin ketak, Administradór postu Uatucarbau, Alfredo dos Santos, hateten akontesimentu udan-boot hodi kalan, halo mota sa’e no afeta komunidade suku Uani-Uma, iha aldeia Osomali  no suku Irabin de Baixu efeta ba aldeia Beturia no Uatudere, ne’ebé kuaze mota estraga hotu komunidade sira-nia hela fatin inklui estraga sasán sira.

“Agora daudaun ne’e, ha’u hamutuk ho xefe suku sira iha hela fatin akontesimentu inundasaun hodi rekolla família vítima afetadu sira. Tanba mota sobu komunidade sira-nia uma, lalin sasán no animál sira mota lori ba hotu tasi. Dadus família afetadu no sasán sira to’o agora ami sei rekolla, hotu maka fó sai ba públiku,” nia informa.

Aleinde ne’e, Autoridade sira halo identifikasaun ba komunidade afetadu sira hodi evakua ba fatin seguru no presiza apoiu emerjénsia hahán hodi ajuda komunidade afetadu sira bele han.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!