iklan

COVALIMA, SEGURANSA

Membru PNTL 30-resin fó seguransa ba dadur 118 iha aeroportu Covalima

Membru PNTL 30-resin fó seguransa ba dadur 118 iha aeroportu Covalima

Autoridade Covalima evakua dadur na’in-118 iha prizaun Covalima ba aeroportu Komandante Kay Rala Xanana Gusmão tanba udan boot iha sesta (30/6) ne’e hamosu inundasaun ne’ebé bee-mota tama prizaun Covalima iha aldeia tabakolot, suku Debos, postu administrative Suai, Munisípiu Covalima. Imajen Tatoli/Celestina Teles.

COVALIMA, 01 jullu 2022 (TATOLI)–Komandante PNTL Munisípiu Covalima, Superintendente Polisia, Basílio de Jesus hateten membru PNTL na’in 30-resin fó apoiu seguransa hodi reforsa seguransa guarda prizonál ba dadur 118 ne’ebé evakua no hela provizóriu iha aeroportu Komandante Kay Rala Xanana Gusmão.

Notísia Relevante: Bee tama prizaun Covalima: dadur 118 evakua ba aeroportu Kay Rala Xanana Gusmão

“Polisia reforsa apoiu seguransa ba guarda prizonál hodi fó seguransa ba dadur sira iha aeroportu Kay Rala Xanana Gusmão komesa sesta (30/06) kalan. Ha’u orienta la limita membru 30-resin mak destaka hodi asegura ita-nia dadur sira atu fó apoiu ba guarda prizonál sira,” Basílio de Jesus hateten ba Agncia Tatoli, iha aldeia Akar-Laran, suku Suai Loro, sesta ne’e.

Razaun fó apoiu seguransa hodi reforsa ba guarda prizonál sira, tanba aeroportu la’ós sela ba dadur sira atu hela maibé tanba inundasaun mak dadur hirak ne’e evakua provizóriu iha fatin refere.

“Ita-apoiu tanba iha aero portu la’ós fatin ba dadur nia sela maibé ita empresta ofísiu normál, aeroportu ita tau ema. Ha’u mós fó hatene ba diretór atu dadur sira bele koopera atu labele tenta sai hosi aeroportu. Dadur tenke kumprr koopera ho justisa mantein sira-nia pozisaun,” nia informa.

Maske nune’e ohin komandante mós simu ona telefone hosi diretór atu halo evakuasaun ba fatin prizaun Covalima maibé komadante seidauk autorida tanba sei haree kondisaun klima.

Tuir dadus, dadur iha prizaun Covalima ne’ebé evakua ba aeroportu hamutuk na’in-118 ho guarda prizonál na’in-38.

Jornalista : Celestina Teles

Editor       : Cancio Ximenes

iklan
iklan

Leave a Reply

iklan
error: Content is protected !!