iklan

BOBONARO, HEADLINE, MUNISÍPIU, POLÍTIKA

Programa Naroman ba Suku, entre promesa no solusiona preokupasaun iha baze

Programa Naroman ba Suku, entre promesa no solusiona preokupasaun iha baze

Lian-na'in suku Lontas, postu administrativu Lolotoe, munisípiu Bobonaro, simu membru governu sira molok realiza diálogu komunitária liuhosi Programa Naroman ba Suku. Imajen Tatoli/Sérgio da Cruz.

BOBONARO, 01 jullu 2022 (TATOLI) Programa Naroman ba Suku ne’ebé organiza hosi Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, atu membru governante sira rona direita no fó solusaun ba preokupasaun povu nian iha baze.

Iha loron-sesta ne’e, MAPKOMS hala’o diálogu komunitáriu ho komunidade iha suku Lontas, postu administrativu Lolotoe, munisípiu Bobonaro liuhosi programa “Naroman ba Suku”.

Molok hahú atividade ne’e, lia-na’in sira simu membru governu ssira komposta hosi Ministru ba Asuntu Parlamentár no Komunikasaun Sosiál (MAPKOMS), Fransisco Martins Jerónimo, Ministra Saúde, Odete Maria Freitas Bello, Vise Ministru Administrasaun Estatál, Lino de Jesus Torrezão, ho tara-tais akompaña ho bidu ho lian dadolin hosi refere.

Notísia relevante:MAPKOMS hala’o diálogu ho komunidade Hatulia

Sekretáriu Autoridade Munisípiu Bobonaro, João Fátima do Carmo, agradese ba prezensa governante sira tanba liuhosi programa Naroman ba suku bele rona direita komunidade sira-nia preokupasaun.

Sekretáriu Autoridade MunisÍpiu Bobonaro, João Fátima do Carmo. Imajen Tatoli/Sérgio da Cruz.

“Liuhosi programa sira-ne’e mak hanesan oportunidade di’ak ba komunidade sira atu hato’o sira- nia prekupasaun kona-ba infraestrutura bázika hanesan bee-moos, estrada, eletrisidade no produtu agrikultura nian, atu iha tempu tuir mai bele fó solusaun ba buat-ne’ebé autórdidade munisípiu laiha kbiit atu rezolve,” nia dehan.

Xefe suku Lontas, postu administrativu Lolotoe, munisípiu Boboinaro, Alípio Belo, sente kontente tanba maski rai-udan no tahu governante sira bele disponibliza tempu to’o ona iha suku ne’e, maibé tuir nia liuhosi prgrama ne’e hanesan oportunidade di’ak atu hato’o preokupasaun ne’ebé enfrenta durante ne’e.

Xefe suku Lontas, Alipio Belo. Imajen Tatoli/Sérgio da Cruz.

Nia dehan, governu presiza haree direita kondisaun estrada liga hosi suku to’o Maliana vila tanba iha tempu udan difikulta komunidade sira lori produtu lokál ba  ba merkadu.

“Uluk hosi Institutu Jestaun Ekipamentu fó ona apoiu loke ona dalan hosi Ozo ba to’o suku Gildapiil, maibé realidade ne’ebé akontese to’o agora impaktu movimentasaun transporte iha situasaun udan,” nia katak.

Nia aprezenta katak komunidade iha aldeia ida iha suku ne’e to’o agora seidauk asesu bee-moos iha tempu bailoron no udan.

Nune’e mós kondisaun Ensinu Báziku Filiál (EBF) Ozo mós anin sobu dezde tinan 2021 liubá to’o agora seidauk hadi’a.

“Bainhira udan maka’as no anin-boot bele fó impaktu ba estudante no profesór sira, ne’ebé ami husu atu tau iha ajenda hodi hato’o ba Ministru Edukasaun Juventude no Desportu atu rezolve iha tempu sira tuir mai,” nia sujere.

Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten programa diálogu komunitária ka programa

Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hato’o hela intervensaun iha programna Naroman ba suku ne’ebe realiza iha suku Lontas. Imajen Tatoli/Sérgio da Cruz.

“Naroman ba Suku” ne’e hanesan Governu mai iha povu nia leet hakarak hatene komunidade sira-nia preokupasaun no problema ne’ebé wnfrenta iha moris loron-loron.

“Ohin loron ami mai iha imi-nia leet, tanba polítika VII Governu Konstituisionál ne’ebé lidera hosi Jenerál Taur-Matan Ruak, katak ema mak sai sentru ba dezenvolvimentu, tanba ne’e atividade hotu ne’ebé governu halo aposta ba ema, entaun ema mak tenke book-aan, ema mak tenke serbisu atubele atinje dezenvolvimentu ne’ebé ita hotu hakarak,” nia dehan.

Governante ne’e dehan, asuntu bee-moos nia parte sei ko’alia ho Ministru Obra Públika atu orienta BTL.EP atubele dada nunee komunidade bele asesu ba bee-moos no estrada ne’ebé durante ne’e sai prekupasaun iha Lolotoe.

Kona-ba kondisaun eskola resjista ona iha agenda nune’e banhira fila ba Dili sei aprezenta ba Ministru Edukasaun Juventude no Desportu (MEJD), Armindo Maia, atu haree asuntu ne’e nun’e bele tau iha planu prioridade atu rezolve.

Partisipa iha diálogu komunitária ne’e mak hanesan Ministra Saúde, Odete Maria Freitas Belo, Vise Ministru Administrasaun Estatál, Lino de Jesus Torrezão, reprezentante Sekretáriu Estadu Kooperativa, Sekretáriu Autoridade Munisípiu Bobonaro, João Fátima do Carmo.

Nune’e mós Segundu Komandante PNTL Munisípiu Bobonaro, Asistente Superintedente Fasio de Jesus Lima, Prezidente Konselu Diretivu Agência Tatoli, Institutú Públiku (Tatoli,I.P), Manuel Pinto, Prezidente Bee Timor-Leste (BTL,E.P), xefe suku hotu iha postu administrativu Lolotoe, lian-na’in no komunidade suku Lontas.

Notísia relevante:MAPKOMS hala’o diálogu ho komunidade Leimea Craic

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!