DILI, 04 jullu 2022 (TATOLI)—Asosiasaun TANE Konsumidór halo peskiza ba konsumidór eletrisidade iha munisípiu Dili, espesiál ba konsumidór 111 ne’ebé hatudu katak populasaun 35,7% bainhira ahi mate la reklama ba Eletricidade de Timor-Leste, Empreza Públika (EDTL, E.P, sigla portugés).
Prezidente TANE Konsumidór, António da Silva Ramos, hateten, estudu ne’ebé halo buka hatene hanoin hosi konsumidór sira, liga ba kualidade hosi prestasaun servisu, folin, tarifa sira ne’ebé aplika no atendimentu.
Estudu ne’e mós buka hatene persepsaun konsumidór, realasiona ho ahi mate ka korte energia elétrika no medida saida maka foti atu rezolve kestaun ne’e.
“Konsumidór sira ne’ebé sofre ahi mate, maibé la liga ba EDTL hodi halo reklamasaun, ne’e nia numeru sei a’as hela (35,7%),” Prezidente TANE Konsumidór hateten iha ninia knaar fatin, Vila-Verde, segunda ne’e.
Notísia relevante: EDTL selebra akordu ho IPG no IGE fornese servisu di’ak liu
Nia dehan, informasaun ne’ebé TANE halibur bele haree katak grau satizfasaun konsumidór sira razoavelmente pozitivu, katak metade (56,7%), no ba konsumidór globál metade 43,3% satizfeitu no la satizfeitu.
Jerente ne’e konsidera, konsumidór la halo reklamasaun ba EDTL tanba razaun hanesan la hatene maneira atu reklama, laiha tempu atu reklama no tauk atu reklama.
“Ida-ne’e signifika nesesidade informasaun ba konsumiór tenke barak, atu sira koñese sira-nia direitu no laiha reseiu atu ezerse sira-nia direitu, maibé fornesedór mós presiza divulga ho visibilidade di’ak liután no transparénsia iha kontaktu ba liña atu apoiu konsumidór sira,” nia akresenta.
Aleinde ne’e, prosedimentu reklamasaun tenke hadi’a liután no simplifika, atu kualker konsumidór la haree ba sira-nia estudu ka kondisaun ekonómika, bele prontu atu halo reklamasaun.
“Ba prestasaun servisu, kestaun rua ne’ebé koloka iha evidénsia, hanesan maski foti tia ona medida sira, ahi mate la programada ka aviza antes ahi mate no tempu atu halo moris fali ahi sei a’as tebes ba servisu publiku esensiál,” nia tenik.
Bazeia ba rezultadu hosi TANE Konsumidór, katak konsumidór 37,8% sente katak folin eletrisidade ne’e a’as tebes no komunidade 4,5% hateten laiha eletrisidade iha sira-nia uma tamba selu labele.
Nune’e mós, iha konsumidór inkeridu 44,1% iha apresiasaun pozitivu ba atendimentu EDTL, E.P nian, sira hatan katak sempre hetan atendimentu no resposta ba sira-nia kestaun hosi konsumidór 25,2%, iha opiniaun negativa 15,3% dehan katak hetan atendimentu, maibé la hetan resposta ba sira-nia problema no 9,9% afirma katak la konsege halo kontaktu ho EDTL.
Jornalista : Arminda Fonseca
Editora : Julia Chatarina
