Deputadu bankada CNRT husu MEJD rezolve prosesu rekrutamentu profesór 2.000
DILI, 05 jullu 2022 (TATOLI)—Deputadu bankada Congresso Nacional de Reconstrução Timorense (CNRT), Gabriel Soares, husu ba Ministru Edukasaun Juventude no Desportu (MEJD), Armindo Maia, atu rezolve prosesu rekrutamentu profesór voluntáriu 2.000.
“Ami hein hela ita-boot tenke fó esplikasaun loloos kona-ba profesór 2.000 ne’ebé ita-boot sira atu rekruta ne’e atu ba kontratu ka sa’e liu kedan ba permanente,” Deputadu Opozisaun ne’e hateten iha sala plenária Parlamentu Nasionál, tersa ne’e.
Notísia relevante: MEJD planeia rekruta profesór voluntáriu 2.000 iha setembru
Aleinde ne’e, Deputadu Gabriel husu Ministru atu halo komunikasaun di’ak ho entidade relevante tanba nota katak durante ne’e parte MEJD sempre dun malu ho Komisaun Funsaun Públika (KFP).
“Ami husu ba ita-boot, ita dun ba KFP. Ami husu ba KFP dun ba MEJD, la han malu. Deputadu sira iha Parlamentu ne’e komprende MEJD mak hanesan uma-na’in ne’ebé atu uza traballadór. Tanba ne’e, deputadu sira hakarak hatene servisu KFP nian ne’e saida?,” nia akresenta.
Hatan ba preokupasaun ne’e, Ministru Edukasaun Juventude no Desportu, Armindo Maia, hateten, tuir planu kuandu buat hotu la’o di’ak, profesór voluntáriu 2.000 sei hetan kontratu iha setembru tinan ida-ne’e, enkuantu ba profesór kontratadu 4.900 nian, MEJD labele deside mesak.
“Bainhira sira atu hakat ba permanente, ministériu tenke submete ba Konsellu Ministru hodi deside tuir desizaun polítika, hafoin sei haruka ba KFP atu deskonjela dekretu-lei, ne’ebé atubele konjela tiha rekrutamentu funsionáriu permanente hodi bele avansa ba oin,” Ministru esplika.
Notísia relevante: MEJD aprezenta roteiru rekrutamentu profesór iha KM
Governante ne’e rekoñese, problema profesór voluntáriu no kontratadu ne’e sai hanesan naha todan ida ba VIII Governu, tanba asuntu ne’e akontese kuaze tempu naruk ona maibé to’o ohin loron mós seidauk hetan de’it ninia solusaun.
“Ita hotu hatene kuaze tinan-10 liu ona no durante ami-nia mandatu ami buka atu rezolve. Ida-ne’e ami-nia kompromisu, bainhira asuntu ne’e maka depende ba despaixu ministeriál de’it, ha’u hasai despaixu ida buat hotu rezolve ona, maibé la’ós hanesan ne’e,” nia tenik.
Governante ne’e konfesa katak, prosesu rekrutamentu profesór kontratadu no voluntáriu ne’e presiza hetan koñesimentu hosi Konsellu Ministru no PN, hafoin presiza mós hetan pronúnsia hosi parte KFP bainhira funsionáriu ida atu sai permanente.
“Bainhira la hetan koñesimentu hosi parte tolu ne’e sei la hetan konsiderasaun. Realidade maka akontese foin lalais iha Ermera, Diretór Servisu Edukasaun Munisípiu Ermera nomea tiha funsionáriu ida maibé realidade laiha baze legál, signifika lei la fó dalan, entaun ministériu iha obrigasaun halo kanselamentu ba nomeasaun ne’e,” nia haktuir.
Jornalista : Tomé Amado
Editora : Julia Chatarina
