Hasa’e produsaun no dezenvolve ortikultura sai prioridade projetu HAPAS iha Naimeko
OÉ-CUSSE, 05 jullu 2022 (TATOLI) – Xefe suku Naimeko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), Marcos Liu, fó-sai katak, atividade prinsipál ne’ebé grupu benefisiáriu sira implementa iha projetu Hasa’e Produtividade Agrikultura Sustentaável (HAPAS) iha suku maka hasa’e produsaun no dezenvolve ortikultura.
“Programa HAPAS durante ne’e hala’o iha ha’u-nia suku hamutuk grupu hitu, sira hahú programa primeiru maka alimentasaun hasa’e produsaun, daruak programa ortikultura no datoluk mak florestasaun maibé seidauk la’o, maibé hasa’e produsaun no ortikultura mak sai prioridade liu iha ha’u-nia suku tanba iha-ne’e etapa dahuluk ne’e sira susesu no iha duni rezultadu,” Xefe suku Naimeco Marcos Liu, hatete iha Oé-Cusse, tersa ne’e.
Kontinua ba etapa daruak mka dezenvolve setór pekuária hakiak animál, ba grupu hakiak animál sira-ne’e foin mak atu hala’o sira-nia atividade, tanba hetan apoia fundu iha abríl foin lalais ne’e, hanesan bibi rua no fahi rua, inan ida no aman ida, ho osan hamutuk $700 atu prepara animál sira-nia luhan, no totál grupu benefisiáriu iha suku Naimeco hamutuk 24, hetan ona apoiu fundu grupu 21.
“Iha grupu tuan hamutuk hitu, sira hahú envolve iha projetu HAPAS iha 2018, ho programa prioridade mak hasa’e produsaun kuda ai-farina, fehuk, fore-rai, batar no haree no ortikultura kuda modo hodi fa’an iha merkadu, tanba ha’u-nia suku iha merkadu tradisionál ne’ebé realiza semanál kada loron tersa, ba ortikultura seidauk la’o tanba ai-oan sira hanesan sabraka no kafé seidauk lori ba merkadu sei produtivu hela, maibé iha futuru sei sai poténsia di’ak iha ha’u-nia suku,” nia katak.
Autoridade komunitáriu ne’e orgullu tanba prezensa projetu HAPAS iha suku, halo komunidade serbisu barak, tanba envolve iha grupu oinsá dezenvolve fini ne’ebé apoia hosi HAPAS, nune’e husu ba Ministériu Agrikultura no Peska (MAP) atu kontinua implementa iha futuru.
“Programa ne’e di’ak fó moris ba komunidade tan hetan fini gratuita direita no indireita, envolve komunidade iha kada grupu atu serbisu solidariedade iha to’os permanente atu dezenvolve sira-nia programa, ne’ebé espera MAP persiza kontinua programa iha futuru,” nia espera.
Notísia relevante: Grupu sia iha suku Malelat susesu implementa projetu HAPAS
Jornalista : Abílio Elo Nini
Editór : Evaristo Soares Martins
