iklan

EDUKASAUN, COVALIMA, POLÍTIKA

Covalima-oan la aseita Governu hapara atividade klase paralela UNPAZ iha Suai

Covalima-oan la aseita Governu hapara atividade klase paralela UNPAZ iha Suai

Covalima-oan sira realiza konferénsia imprensa kona-ba Governu liuhosi MESSK hapara atividade klase paralela Universidade da Paz (UNPAZ). Imajen Tatoli/Celestina Teles.

COVALIMA, 07 jullu 2022 (TATOLI)–Porta-vós Covalima-oan, Felisberto Araújo de Jesus, hateten Covalima-oan la aseita desizaun Governu liuhosi Ministru Ensinu Superiór Siénsia no Kultura, Longuinos dos Santos, hasai deklarasaun iha sesta (01/07) deside taka atividade klase paralela UNPAZ iha Suai.

Notísia Relevante: MESSK inisia altera rejime estabelesimentu ensinu superiór hodi hadi’a kualidade

“Ami Covalima la aseita ho desizaun ne’ebé Ministru Ensinu Superiór Siénsia Kultura, Longuinos dos Santos, públika sai iha mídia atu hapara atividade klase paralela UNPAZ iha Suai. Ami estudante Universidade da Paz (UNPAZ) klase paralela Suai hamutuk ho veteranu, autoridade lokál, igreja, juventude no estudante sira hotu firme atu kontinua ativa klase paralela UUNPAZ iha Suai,” Porta-vós Covalima-oan, Felisberto Araújo de Jesus, hato’o liuhosi konferénsia imprense, iha resintu klase paralela UNPAZ Suai, kinta ne’e.

Covalima-oan lakohi atu Governu hapara atividade klase paralela UNPAZ iha Suai ho razaun atu bele hakmaan estudante nomós inan-aman sira-nia finanseiru, fasilita estudante ne’ebé ramata ensinu sekundáriu bele kontinua sira-nia estudu ba iha nivél universidade ne’ebé eziste iha Suai.

Aleinde fó biban ba joven sira, nia dehan, bele fó biban mós ba funsionáriu públiku ho nivél edukasaun ho sekundária de’it bele hetan oportunidade hodi kontinua sira-nia estudu ba nivel universidade liuhosi atividade klase paralela UNPAZ iha Suai hodi hetan abilidade.

Ho nune’e, Covalima-oan hato’o agradese ba UNPAZ ne’ebé loke nia klase paralela iha Suai tanba inan-aman no komunidade ho autoridade munisipál iha Covalima apresia ezisténsia UNPAZ iha Suai.

Notísia Relevante: UNPAZ sei kompleta rekezitu atu hetan lisensa operasionál ba klase paralela

Bazea ba dokumentu ne’ebé Agência Tatoli asesu, Ministériu Ensinu Superiór Siénsia no Kultura haruka notifikasaun kona-ba Klase Paralela iha Reziaun Administrativa Espesiál Oé-Cusse Ambeno (RAEOA), Covalima no Viqueque ba reitór Universidade da Paz ne’e katak MESSK realiza atividade fiskalizasaun tuir kompeténsia ne’ebé atribui hosi lei baze edukasaun artigu 3 katak Compete ao Estado Licensiar avaliar e ficalizar o Encino particular e cooperativo nos termos legais”

Nune’e mós dekretu-lei númeru 2/2019, 5 marsu, ne’ebé aprova órganika Ministériu Ensinu Superior Siénsia no Kultura friza katak “MESCC e o departamento governamentál Reponsavél pela concecão execacão coordenação e avaliacão da polítca definida e aprova pelo Concelho de Ministro para as areas do Encino Superior e da cualificão de nível superior assim como para os áreasde ciéncia da tecnologia das artes e da cultura”.

Iha sorin seluk, tuir dekretu-lei númeru 8/2010, 19 maiu, kona-ba Rejime Jurídiku estabelesimentu ensinu superiór hatuur iha artigu 11 pontu 2 alinea A hodi fó kompeténsia ba membru Governu no responsavél ba área ensinu superiór katak “Verificar a satisfação dos requisitos exigidos para a criação e funcionamento dos estabelecimentos da Ensino superior, designadamente através do respetivo licenciamento”.

Ho nune’e, Dirasaun Jerál Ensinu Superiór Siénsia no Kultura notifika reitór UNPAZ ho nia estrutura tanba UNPAZ komete inflasaun ka irregularidade bainhira estabelese klase paralela iha RAEOA, Suai no Viqueque sein iha lisensa operasionál.

Diploma ministerial númeru 13/2017, 8 marsu, kona-ba regulamentu lisensiamentu estabelesimentu Ensinu Superiór ne’ebé friza katak “É expressamente proibido a qualker pessoa privada ou coletiva, de qualcer natureza jurídica dar inicio nos seu funcionamento ou a qualquer tipo de atividade académica de encinu superior, sem que tenho obtido a liçenca operacionál de funsionamento”.

Nune’e mós despaixu Ministeriál númeru 90/GM/MESCC/II/2020 kona-ba kadernu padraun lisensiamentu ba instituisaun ensinu superiór sira.

Tanba ne’e, solisita atu taka atividade ensinu aprendizajen iha klase paralela RAEOA, Suai no Viqueque tanba faktu hatudu atividade hala’o sein iha lisensa operasionál hosi MESSK, formaliza estrutura klase paralela.

UNPAZ la aprezenta proposta tuir prazu estipuladu Dirasaun Jerál Ensinu Superiór Siénsia no Kultura sei solisita membru Governu atu emite despaixu negatóriu atu taka atividade ensinu.

Bainhira UNPAZ koopera hodi ensera atividade tenke submete relatóriu enseramentu mai iha Dirasaun Jerál Ensinu Superiór Siénsia no Kultura (DGESSK), se bainhira UNPAZ la kumpre rekezitu DGESK sei solisita membru Governu responsavél ba ensinu superiór atu emite ordén enseramentu kompulsivu iha kazu ida-ne’e sei solisita ba polísia.

Notísia Relevante: UNPAZ sei kompleta rekezitu atu hetan lisensa operasionál ba klase paralela

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!