VIQUEQUE, 07 jullu 2022 (TATOLI)–Ministériu Obra Públika (MOP) orienta ona empreza Sabirara, Unip. Lda, hodi normaliza ponte mota Lapara iha suku Uani-uma, postu Uatucarbau, munisípiu Viqueque, ne’ebé kotu tanba udan-boot ne’ebé akontese iha loron 30 juñu.
“Daudaun MOP konsege orienta empreza lori ekipamentu eskavatór hodi normaliza ponte ne’ebé kotu foin lalais ne’e. Empreza hahú normaliza ponte iha loron domingu (03/07). Nune’e, daudaun transporte no ema sira la’o bá-mai di’ak fali ona,” Xefe suku Uani-uma, António de jesus, informa ba Agência Tatoli, via telefónika, kinta ne’e.
Notísia relevante: MOP Viqueque koordena parte nasionál hodi normaliza ponte Uani-uma
Tuir líder komunitáriu ne’e, foin lalais ponte kotu difikulta transporte no ema halo movimentu tanba laiha dalan alternativa hodi ultrapasa mota Lapara.
Iha fatin ketak, Diretór Servisu Obra Públika munisípiu Viqueque, Mário do Rego, hateten, parte MOP nasionál fó ona orientasaun mai MOP Viqueque no orienta enjiñeru destakadu iha postu Uatucarbau hodi fó hatene ba empreza Sabirara, Unip. Lda hodi hahú normaliza.
“Prosesu pagamentu komforme orientasaun hosi nasionál mai, sei selu tuir oras serbisu ba ekipamentu ne’ebé halo normalizasaun mota Lapara iha Uani-uma no ema sira ne’ebé hala’o serbisu,” nia akresenta.
Jornalista : Vitorino Lopes da Costa
Editora : Julia Chatarina
