PM Taur lamenta ho ekipa jestaun merkadoria Dili estraga sasán vendedór
DILI, 07 jullu 2022 (TATOLI)–Primeiru-Ministru (PM), Taur Matan Ruak, lamenta ho kondisaun ekipa jestaun merkadoria munisípiu Dili, estraga sasán vendedór sira ne’ebé fa’an hela sasán besik estrada ibun iha rotunda estátua Prezidente Nicolau Lobato, Comoro, iha kuarta (06/07).
“Iha tempu kotuk, bainhira ha’u bolu Prezidente Autoridade Dili ba Farol, ha’u ko’alia mós kona-ba kestaun kontrola sidadaun fa’an sasán. Ha’u-nia pedidu maka enkuantu sira fa’an iha fatin sira ne’ebé la interrompe movimentu sidadaun bá-mai labele book sira, karik book tenke negosia ho sira, esplika ho sira tanba saida mak muda sai, maibé labele agresivu demais, tanba ne’e ha’u lamenta ho situasaun ida-ne’e,” PM Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Notísia relevante: AMD autoriza hikas vendedór 35 hala’o negósiu iha merkadu Manleuana
Ba kondisaun ne’e, Xefe Governu husu ba vendedór sira, liuliu vendedór modo-tahan atu labele fa’an sira-nia sasán iha estrada klaran tanba bele lori risku ba sira-an rasik.
“Ha’u husu ba ita-nia vendedór sira atu labele fa’an fali iha estrada klaran. Imajina kondutór ida hemu tua barak depois lori karreta tesik bá mak sama sira, ne’e dehan Governu mak la hatene jere, entaun ikus liu Governu mak sala de’it, sidadaun nunka sala. Tanba ne’e maka ha’u husu kompreensaun sira-nia atu disiplina oituan, iha fatin balun bele fa’an sasán maibé fatin balun labele tanba bele lori risku ba vida,” nia fó hanoin.
PM simu ona informasaun hosi Ministru Administrasaun Estatál (MAE), Miguel de Carvalho, liga ho akontesimentu ida-ne’e.
Jornalista : Antónia Gusmão
Editora : Julia Chatarina

