VIQUEQUE, 07 juñu 2022 (TATOLI)–Organizasaun internasionál United Nations Fund for Population Activities (UNFPA, sigla inglés), kinta ne’e, fó apoiu pakote emerjénsia ba vítima inundasaun hamutuk 440 iha munisípiu Viqueque.
“Ami mai entrega pakote emerjénsia hamutuk 440 ba munisípiu Viqueque hodi ajuda ita-nia vítima afetadu inundasaun ne’ebé akontese iha semana kotuk liubá, hodi responde emerjénsia ita-nia vítima sira,” Xefe UNFPA, Domingas Bernardo, informa ba Agência Tatoli, hafoin ramata entrega pakote emerjénsia, iha munisípiu Viqueque.
Notísia relevante: Uma-kain 102 hosi suku Maluru simu ona pakote emerjénsia
Organizasaun UNFPA haree ba asuntu populasaun nian, liuliu ba inan isin-rua, inan sira ne’ebé foin partu no labarik feto sira.
“Ho ida-ne’e, ami fó apoiu ba inan-feto no labarik sira tanba foin lalais ne’e sira hetan dezastre inundasaun. Tanba ne’e, organizasaun UNFPA mai ajuda sira, tanba sira lakon sasán barak,” nia akresenta.
Sasán sira ne’ebé UNFPA fó apoiu kompostu hosi sasán ba feto sira, ne’ebé vítima sira bele uza durante iha tempu emerjénsia nia laran.
Jornalista : Vitorino Lopes da Costa
Editora : Julia Chatarina
