Aban, atleta Manuel Belo arranka hosi Jakarta bá EUA
DILI, 11 jullu 2022 (TATOLI) – Atleta hosi modalidade atletizmu, Manuel Belo, tersa (12/08), hahú arranka hosi Jakarta-Indonézia bá Estadu Unidu Amérika (EUA) hodi partisipa eventu World Athletics Championship OREGON22.
Atleta Manuel Belo ho ekipa, durante loron ualu iha Jakarta-Indonézia hodi trata dokumentu liuliu viza atu bá Estadu Unidu Amérika (EUA).
“Durante loron ualu, ami hela iha Jakarta hodi trata viza atu ba Amérika hodi partisipa eventu World Athletics Championship, agora dokumentu hotu ona no teste PCR mós hotu ona, nune’e hein aban ami arranka ona bá Amerika,” Prezidente Federasaun Atletizmu Timor-Leste (FATL) Afranio Xavier Amaral, hateten ba Agência TATOLI via WhatsApp, segunda ne’e.
Durante iha Jakarta, nia dehan hela iha Bekasi-Indonézia no timoroan ida naran Aris Pereira mak sai matadalan hodi komunika ho autoridade Bekasi atu autoriza atleta Manuel Belo hala’o treinamentu iha Estádiu Nasionál Bekasi.
“Loron hira ita prepara iha Indonézia, nune’e kondisaun atleta di’ak hela no kontinua nafatin han no hemu di’ak tanba oferese hosi timoroan Aris Pereira ne’ebé nia mós hanesan eis atleta timoroan nian ida bainhira Timor-Leste sei hola parte iha Provinsia ida hosi Indonézia ho naran Timor-Timur,” nia dehan.
Ekipa ne’ebé dezloka ba EUA, kompostu hosi atleta na’in-ida, ofisiál ida no akompaña direta hosi Prezidente FATL. Enkuantu atividade ne’e sei hala’o iha loron 13 to’o 21 jullu, tinan ne’e.
Atleta Timoroan ne’e sei kompete iha kurida ho metru 800 hosi nasaun membru hamutuk 214.
Hafoin partisipa iha eventu ne’e, líder federasaun Atletizmu hosi nasaun 214 ne’e, sei hala’o reuniaun importante hodi diskute kona-bá situasaun ne’ebé kada nasaun enfrenta.
Partisipa iha eventu ne’e FATL hetan apoiu orsamentu hosi Sekretáriu Estadu Juventude no Desportu (SEJD) hamutuk $16,000.
Notísia relevante: Atleta Manuel Belo arranka bá EUA partisipa eventu World Athletic Championship
Jornalista: Hortencio Sanchez
Editór : Florencio Miranda Ximenes
