PNTL propoin millaun $52 iha OJE 2023
DILI, 12 jullu 2022 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, hateten PNTL hamutuk ho Ministériu Interiór (MI) halo diskusaun hodi propoin millaun $52 iha Orsamentu Jerál Estadu (OJE) 2023.
“Ami horiseik halo ona diskusaun ba Planu asaun anuál no Orsamentu 2023 nian, iha diskusaun espesiál ne’e. Ami propoin millaun $52 iha OJE 2023,” Komandante Jerál PNTL ne’e, hateten ba Agência TATOLI, iha Kuartel Jerál PNTL Caicoli, tersa ne’e.
Komisáriu ne’e esplika hosi orsamentu millaun $52, prevee millaun $9 ba iha atividade PNTL nian liga ba seguransa eleisaun parlamentár ne’ebé maka sei akontese iha tinan oin no orsamentu balun sei aloka ba verba rejime salariál membru PNTL nian no rekrutamentu ba efetivu foun PNTL ne’ebé sei halo tinan oin nian inklui halo tratamentu saúde ba membru PNTL.
Tanba, iha 2021 rasik membru PNTL hamutuk nain -30 resin maka mate no tinan ne’e membru PNTL liu nain-10 maka mate.
“Ita presiza tau osan, nune’e membru PNTL sira bele halo check up ba sira nia saúde, nune’e sira bele hatene sira nia saúde hodi serbí povu no nasaun,” nia afirma
Hosi orsamentu ne’e sei aloka ba iha infraestrutura PNTL nian,liuliu ba iha reabilitasaun Eskuadra PNTL sira ne’ebé daudaun ne’e kondisaun aat ona.
“Ita bo’ot sira hatene iha orsamentu tinan oin, ami mós tau uituan atu hadi’a eskuadra PNTL nian ne’ebé maka nia kondisaun a’at ona no daudaun ne’e komandu PNTL halo hela levatamentu,” nia afirma.
Alende ne’e, iha tinan 2023 Komandu PNTL atu hola karreta operasionál balun, no rádiu komunikasaun inklui halo instalsaun torre.
Daudaun ne’e, karreta operasionál iha Komandu munisípiu no Eskuadra balun laiha hodi difikulta atu atende kazu ruma ne’ebé akontese iha área remota.
“Membru PNTL sira uza telemovél privadu hodi komunika ba malu de’it tanba rádiu komunikasaun ne’ebé iha la funsiona tanba seidauk instala torre ,” nia afirma.
Jornalista: Natalino Costa
Editór : Florencio Miranda Ximenes
