DILI, 12 jullu 2022 (TATOLI)—Prezidente Konsellu Veteranu Munisípiu Ermera António Soares ‘Tatamailau’, hateten tuir planu grupu veteranu grau 0-3 no 4-7 iha Ermera ne’ebé lahetan pensaun kada fulan ne’e sei kria grupu soru tais no hakiak animál hodi buka moris.
Notísia Relevante: Deputadu Lima-Lima Husu Veteranu Ermera Labele Impede Dezenvolvimentu
“Kona-ba planu Governu integra veteranu iha vida ekonómika, ita bele dehan Governu seidauk implementa. Maibé, iha Ermera feto sira forma grupu hodi soru tais tanba hakarak promove tais Timor-Leste liu-liu tais Ermera nian ba mundu,” António Soares ‘Tatamailau’ hateten ba Agência TATOLI iha eskritóriu CCLN, Dili, tersa ne’e.
Tatamailau hateten, grupu soru tais ne’e veteranu parte Postu Administrativu Atsabe nian mak forma ona grupu no entrega ona mai CCLN maibé seidauk iha rezultadu.
“Ami hatama ona grupu atividade liga ho vida ekonómika nian mai iha Konsellu Nasionál maibé ami seidauk simu rezultadu ba ami-nia proposta ne’e,” nia relembra.
Aleinde soru tais, nia dehan, iha mós grupu haki’ak animál hosi postu administrativu Railaco ho Fatulia, depois grupu rua hosi Ermera no postu adminiatrativu Letefoho no mós planu haki’ak animál.
“Ida-ne’e ami-nia planu no ami hakarak ami-nia maluk veteranu sira mós hetan moris di’ak ho osan natoon ne’ebé Governu oferese, hodi bele halo negósiu no hakiak animál no mós maluk feto sira hakarak soru tais hodi dezenvolve sira-nia oan nia moris iha futuru,” nia hateten.
Tinan ne’e, Governu planu aloka osan rihun $30 ba Ermera no osan ne’e la sufisiente hodi buka moris tanba grupu veteranu barak liu.
“Entaun husu ba Estadu no Governu atu aselera programa ne’e, nune’e bele fó benefísiu ba kombatente sira. Depois husu para tinan oin tenke tau prioridade mós ba veteranu ne’ebé lahetan benefísiu mensalmente. Signifika aumenta osan hodi bele kobre veteranu sira,” nia dehan.
Nia informa, dadus veteranu ne’ebé rejistu iha Munisípiu Ermera, iha postu administrativeu sira ne’e hamutuk ema 3,000.
Jornalista : Osória Marques
Editór : Cancio Ximenes
