DILI, 14 jullu 2022 (TATOLI)— Ministériu Saúde (MS), relata kazu pozitivu foun na’in-ida, rekuperadu haat no kazu ativu 13.
“Ohin kazu detetadu foun ida, rekuperadu haat no kazu ativu 13,” Diretora Jerál Prestasaun Saúde Odete da Silva Viegas hateten liuhosi nota ne’ebé Agência TATOLI asesu, kinta ne’e.
Nune’e, hahú 21 marsu 2020 to’o 14 jullu 2022 iha kumulativu kazu konfirmadu 22.975 no óbitu 133.
Hosi horisehik mai ohin, Laboratóriu Nasionál Saúde halo teste PCR 102, kompostu vijilánsia sentinela laiha, rastreiu ba kontaku rua, rastreiu aleatóriu tolu, viájen internasionál 97, follow up iha kuarentena laiha.
Alende ne’e, totál teste PCR ne’ebé halo iha 14 jullu 2022 iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 36, hanesan Maubisse laiha, Maliana 12, Viqueque laiha, Suai hitu, Baucau laiha Ermera laiha, RAEOA laiha, HNGV 26, Lautém laiha, Vera-Cruz laiha no Manufahi laiha.
Populasaun elijível tinan 18 ba leten, ne’ebe simu ona vasina to’o iha loron 14 jullu 2022, tuir sistema informasaun Saúde iha Ministériu Saúde, hanesan kumulativu doze dahuluk iha Dili hamutuk 88,6% no kumulativu doze daruak iha Dili 83,9%.
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 87,0% no simu ona doze daruak 75,7%.
Hosi insidénsia COVID-19 iha Timor-Leste, durante loron hitu ikus maka 0,4/100 mil abitante.
Iha loron 14 jullu 2022 , izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu laiha no baixa ho COVID-19 laiha.
Notísia Relevante: COVID-19: kazu pozitivu na’in-rua no ativu 16
Jornalista: Felicidade Ximenes
Editór : Florencio Miranda Ximenes
