Top

Funsionáriu EDTL, E.P na’in-80 halo doasaun ran iha ámbitu aniversáriu ba da-II

Funsionáriu EDTL, E.P halo atividade doasaun ran ba Banku Ran HNGV, iha salaun EDTL, E.P, Caicoli, kinta (14/07). Imajen Tatoli/Francisco Sony

DILI, 14 jullu 2022 (TATOLI)—Funsionáriu Eletrisidade de Timor-Leste, Empreza Públiku (EDTL, E.P) na’in-80, kinta ne’e, halo doasaun ran hodi komemora aniversáriu instituisaun ba da-II, ne’ebé monu iha loron 22 jullu 2022.

Prezidente komisaun organizadora ba aniversáriu EDTL, E.P, José Fernandes. Imajen Tatoli/Francisco Sony

Prezidente komisaun organizadora ba aniversáriu EDTL, E.P, José Fernandes, hateten, atividade ne’e hanesan kontribuisaun no solidaridade hosi instituisaun atu tulun maluk sira ne’ebé presiza.

“Ita hotu hatene ran turuk ida bele salva ita-nia maluk, entaun ho ita-nia aniversáriu, ita prepara funsionáriu na’in-80 hodi halo doasaun ran,” Prezidente komisaun organizadora hateten iha salun EDTL, E.P, Caicoli.

Notísia relevante: EDTL selebra akordu ho IPG no IGE fornese servisu di’ak liu

Koordenadór Servisu Transmisaun Ran, Tomas Adelino. Imajen Tatoli/Francisco Sony

Koordenadór Servisu Transmisaun Ran, Tomas Adelino, hateten, hosi funsionáriu EDTL, E.P ne’ebé ohin halo doasaun, Banku Sangue bele hetan to’o litru lima ka neen, maibé depende ba ema ida-idaik ninia todan.

“Ran ne’ebé ohin sira foti hanesan mobile donor, ne’ebé ran sira ne’e sei lori hotu ba laboratóriu nasionál mak ba halo teste atu hatene ba moras no halo teste mós ba kategoria ran. Bainhira teste iha laboratóriu mak balun pozitivu ruma ba moras, maka ita sei halo kontaktu direitamente atu sira halo tratamentu, maibé ran ne’ebé negativu ami prepara ba ema moras,” nia akresenta.

Posoál Banku Ran HNGV haloot hela ran sira ne’ebé hasai ona, ha salaun EDTL, E.P, Caicoli, kinta (14/07). Imajen Tatoli/Francisco Sony

Nune’e, sira ne’ebé iha ran pozitivu ba moras sira hanesan HIV, Hepatiti, sipilis no seluk tan, ran ne’e sei la soe, maibé sei uza filafali ba laboratóriu nasionál hodi uza ba reajente. 

“Daudaun ne’e iha Hospital Nasionál Guido Valadares (HNGV) ran ne’ebé menus mak A no B, ida barak loos ne’e O,” nia dehan.

Ran ne’ebé hasai, ninia durasaun rai ba ran mean bele to’o loron 35 no ba ran mutin ne’e iha rua, kompostu hosi ran mutin plaketas ne’e durasaun rai loron-haat de’it no ran mutin ida plasma mak bele rai to’o tinan-ida.

Funsionáru EDTL, E.P halo konsultasaun ho pesoál Banku Ran HNGV molok halo doasaun ran, iha salaun EDTL, E.P, Caicoli, kinta (14/07). Imajen Tatoli/Francisco Sony

“Daudaun ran iha Banku Nasionál Sangue atu atende ba nesesidade HNGV ne’e sufisiente tanba iha stock hamutuk pakote 200, maibé ba munisípiu sira susar oituan tanba difikuldade ba transporte atu atende,” nia tenik.

Tinan ne’e, aleinde EDTL, E.P halo atividade doasaun ran, iha mós instituisaun lubuk ida ne’ebé apoiu ran hanesan hosi Embaixada Amérika, Institutu Siénsia Saúde (ICS, sigla portugés), inklui Prizaun Bocora, Gleno no Solos Becora.

Jornalista   : Arminda Fonseca

Editora       : Julia Chatarina

Publisidade

Leave a Reply

Latest Post

error: Content is protected !!