CI sensibiliza Lei Komunikasaun Sosiál ‘direitu hatán no retifikasaun’ ba entidade RAEOA
OÉ-CUSSE, 15 jullu 2022 (TATOLI) – Konsellu Imprensa (CI, sigla portugés) Timor-Leste, sesta ne’e sensibiliza Lei Komunikasaun Sosiál kona-bá direitu hatán no retifikasaun ba Autoridade Rejiaun Administrativa Espesiál Oé-Cusse Ambeno (RAEOA), inklui jornalista sira iha rejiaun ne’e.
Prezidente Konsellu Imprensa Timor-Leste, Vírgilio Guteres, informa, lei barak ne’ebé prodús ona iha tinan barak, maibé durante tinan 20 barak mak seidauk hatene lei ne’e, nune’e papél CI kontinua habelár nafatin ba entidade sira iha munisípiu atu iha koñesimentu kona-bá Lei Komunikasaun Sosiál.
“Agora ami mai fokuliu ba Lei Komunikasaun Sosiál fó kna’ar boot rua ba Konsellu Imprensa, primeiru garante independénsia editóriál órgaun komunikasaun sosiál sira, hosi intervensaun podér polítika no podér ekonomia, ne’e katak rádiu no televizaun plataforma online sira eziste iha Timor-Leste, konteúdu jornalístika sira-ne’ebé kobre, ne’e bezea ba sira-nia desizaun editóriál, redasaun mak deside, la’ós orientasaun hosi polítika no pesoál balu,” Vírgilio Guteres, ko’alia iha ámbitu sensibilizasaun Lei Komunikasaun Sosiál iha salaun Dominikana Oé-Cusse.
Nia informa, kna’ar seluk hosi Konsellu Imprensa atu garante públiku liuliu sidadaun sira-ne’ebé lé notísia rona rádiu haree televizaun, ne’e sira hetan informasaun ida loos, katak informasaun ne’ebé órgaun komunikasaun sosiál fó-sai ne’e, bazea ba faktu no realidade, la’ós bazea ba jornalista nia opiniaun pesoál.
Nia fundamenta, direitu liberdade espresaun no liberdade imprensa ne’e tenke garante ba ema hotu, nune’e iha kuartu pilár mak imprensa, bazea polítika podér lejizlativa, podér ezekutivu no podér judisiáriu, tolu ne’e kontrola malu ba fiskalizasaun
Nune’e ba kuartu pilár ne’e semak fiskaliza, entaun atu halo fiskalizasaun ne’e maka maka mosu direitu pozitivu seluk, maka hamosu direitu resposta no diretu retifikasaun.
“Direitu resposta ne’e, direitu ba ema sira-ne’ebé senti prezudikadu hosi publikasaun jornalista sira iha órgaun komunikasaun sosiál, tanba dalaruma ko’ali buat ida jornalista hakerek buat seluk, entaun fonte sira-ne’e iha direitu ba resposta, atu aprezenta fakta foun hodi nega fakta ne’ebé konsumu ona iha públiku katak laloos nune’e mós iha direitu retifikasaun atu halo korresaun,” nia katak.
Prezidente Autoridade RAEOA, Arsénio Paixão Bano, orgullu ho prezensa Konsellu Imprensa tanba bele sensibiliza direitu hatán no retifikasaun ba entidade RAEOA.
“Ha’u hanoin Konsellu Imprensa fó oportunidade mai RAEOA atu aprende oinsá direitu resposta no retifikasaun, iha Oé-Cusse hosi diretór to’o prezidente autoridade orgullu tanba bele mai fó hanoin nafatin, iha imprensa balu bele kritika maibé ho konstrutiva maske la gosta ha’u maibé importante promove Oé-Cusse nia di’ak, balu aat entaun papél mídia bele foti sai hanesan solusaun ida ba autoridade,” nia katak
Jornalista: Abílio Elo Nini
Editór: Evaristo Soares Martins
