HEADLINE, INKLUZAUN SOSIÁL, NASIONÁL, POLÍTIKA

PR Horta lansa livru “Xanana Líder Luta ba Indepedénsia Timor-Leste nian”

PR Horta lansa livru “Xanana Líder Luta ba Indepedénsia Timor-Leste nian”

Prezidente Repúblika, José Ramos Horta lansa livru Xanana “Líder Luta ba Independénsia Timor-Leste nian”, iha resintu CNC, I.P, Balide, sábadu (16/07). Imajen TATOLI/ Antónia Gusmão

DILI, 16 jullu 2022 (TATOLI)—Prezidente Repúblika (PR), José Ramos Horta ho Prezidente Konsellu Administrasaun Centro Nacional Chega, Institutu Públiku (CNC, I.P) akompañadu hosi korpu diplomátiku sira, sábadu ne’e, lansa livru “Xanana Líder Luta ba Indepedénsia Timor-Leste nian”.

“Ha’u haree servisu CNC nian rezultadu ida di’ak tebe-tebes, admiravel, intermu investigasaun ho rigór, rona testemuña rihun ba rihun, depois rona testemuña tenke haree didi’ak dala-ruma testemuña haluha detalla ruma, dala-ruma ita konfunde fatin ne’e normal. Ha’u lako’alia kona-ba livru ne’e, maun Xanana mak bele ko’alia,” Xefe Estadu ne’e hateten hafoin hala’o lansamentu ba livru refere iha ámbitu aniversáriu CNC, I.P ba dala-V ne’ebé realiza iha resintu CNC Antigu Komarka, Balide, Dili.

Biban hanesan, Prezidente Konsellu Administrasaun CNC, I.P, Alzira dos Reis, hateten, CNC lansa livru barak ona maibé ema ladún lee ho di’ak, tanba ne’e mak ho tan lansamentu livru Xanana nian ne’e bele inspira liután lee-na’in sira hotu hodi bele lee livru sira-ne’ebé CNC prodús.

“Tanba istória moruk sira hosi luta eroi no eroína halo hakerek iha livru sira-ne’e, istoría sira-ne’e sai motivasaun ba joven sira, hodi nune’e bele hatene katak luta ne’ebé ita iha, indepedénsia ne’ebé ita iha la’ós mai ho gratuita maibé liuhosi luta ne’ebé naruk, ho ema hothotu nia sakrifísiu. Tanba ne’e mak ho lansamentu livru Xanana nian ne’e kontinua motiva jerasaun foun sira atu bele aprende istória sira-ne’ebé iha hodi nune’e labele repete fila-fali istória moruk sira-ne’ebé ita liu ona,” nia hateten.

Prezidente Konsellu Administrasaun ne’e hato’o agradese ba autór ka hakerek-na’in sira hotu ne’ebé fó konfiansa ba CNC hodi hakerek istória, nune’e bele rai hela ba jerasaun foun sira atu aprende.

“Hakarak mós hato’o ba luta-na’in sira hotu hodi nune’e istória-na’in sira hotu hodi bele transfere istória sira iha livru ka meiu sira seluk ne’ebé bele rai hela ba joven sira,” nia subliña.

Livru ne’e hakerek hosi Sara Niner (sidadaun estranjeiru), ne’ebé hakerek nu’udar ninia monografia hosi Unino hetan revizaun ba dalen tetun hosi Xanana Gusmão, Diretór Ezekutivu CNC, I.P nu’udar mós jornalista seniór mak hanesan editór.

Livru ne’ebé Xefe Estadu lansa ne’e hakerek hosi hakerek-na’in, Sara Niner, ne’ebé ho titúlu orijinál “Leader of Struggle for Independent Timor-Leste” ka iha lian tetun Líder Luta ba Indepedénsia Timor-Leste nian” ne’ebé tradus hosi tradutór timor-oan, José Estevão Soares ba dalen tetun.

Livre ne’e iha pájina hamutuk 300, kompostu hosi kapítulu haat, no dadaun ne’e faan iha edifísiu CNC, I.P Antigu Komarka, Balide, Dili, ho folin $30 kada livru ida.

Entretantu Líder Nasionál, Kay Rala Xanana Gusmão, hateten nia parte haksolok tanba Centro Nacional Chega (CNC) ho esforsu prodús livru ne’e maibé nia parte la simu buat balun ne’ebé hakerek na’in hakerek iha livru laran ne’e, maibé iha sorin seluk nia simu tanba hakerek-na’in hakerek ho fuan no laran.

Ho nune’e, Xanana husu ba joven timoroan sira atu hakerek no labele hein de’it lee ema estranjeiru nia obra, maibé joven sira tenke hahú hakerek no hekerek.

“Ha’u husu ba joven sira atu hakerek. Hakerek primeiru seidauk di’ak tenke koko hakerek beibeik, to’o ikus sei sai di’ak. Ho nune’e de’it mak ita hamutuk bele sadik timoroan sira atu bele iha kultura hakerek,” Xanana Gusmão hateten iha ninia intervensaun bainhira halo resensaun ba livru refere.

Nakait ba asuntu ne’e, Xanana husu ba timoroan sira atu badinas lee no lee tanba liuhosi lee mak sei aumenta ema ida-idak nina matenek no kuñesimentu, nune’e bele iha abilidade atu kaer fali ukun hodi troka jerasaun tuan sira.

“Ha’u husu ba imi joven sira tenke lee beibeik. Lee buat hotu-hotu, nun’e bele aumenta imi-nia kapasidade no kuñesimentu. No husu ba joven sira hatoman an, kaer no lee de’it iha telefone (Hand Phone) laran maibe buka livru sira atu lee no lee. Se imi joven sira loro-loron hafuu HP hodi halimar de’it buat ne’ebé la folin, imi-nia futuru mós sei la folin,” Xanana Gusmão hateten.

Jornalista : Antónia Gusmão

Editór       : Cancio Ximenes

iklan
iklan

Leave a Reply

iklan
error: Content is protected !!