PNTL Bobonaro rejeita informasaun ‘eis xefe suku Oe-Leu’ fa’an kuda ilegál ba Indonézia
BOBONARO, 20 jullu 2022 (TATOLI) – Komandu Polísia Nasionál Timor-Leste (PNTL) Munisípiu Bobonaro, laiha prova atu indika eis xefe suku Oe-eleu, postu administrativu Bobonaro, fa’an kuda ilegál ba Atambua, Repúblika Indonézia.
Komandante PNTL Munisípiu Bobonaro, Superintendente Antoninho Mauluta, esplika loron-segunda tuku 08:00 dadeer eis xefe suku ne’e ho motorista insiál (JS) ne’ebé konduz nia kamioneta lori kuda haat konsege presta ona deklarasaun iha parte seksaun investigasaun kirminál.
Tanba iha loron membru sira hosi eskuadra Bobonaro patrulla konsege identifika eis xefe suku nia kamioneta tula kuda haat hosi diresaun Hauba ba fronteira Lebos, suku Gildapil, postu administrativu Lolotoe, deskonfia atu ba halo atividade tranzaksaun ilegál ba Indonézia.
Notísia relevante:PNTL Bobonaro halo apreensaun ba Kuda no mina ilegál litru 455
Maibé durante prosesu identifikasaun la’o, eis xefe suku ho inisiál (MS) deklara, kuda refere sosa hosi Lebos tula duni iha nia kamioneta ho xapa-matríkula (57.236), maibé objetivu kesi no fó-haan provizóriu de’it iha ninia rezidénsia tanba iha ema balu mak sosa atu lori ba halo lia iha Hauba.
“Ami to’o ohin loron seidauk halo xamada ida, nein atu detein no halo buat ruma ba eis liurai Oe-Leu, ami só bolu de’it mai atu komfirma buat balun ne’ebé nia atu aprezenta, depois horisehik lokraik ne’e nia rasik ho sasán ne’e retira ona ba nia fatin,” nia informa ba Jornalista Tatoli, iha kna’ar-fatin, Maliana, tersa ne’e.
Maske nune’e Superintendente Antóninho Mauluta mós rezeita informasaun ne’ebé publika iha mídia online balun, katak PNTL asegura hela eis xefe suku Oe-Leu, postu administrativu Bobonaro tanba fa’an kuda ilegál iha Indonézia.
“Ha’u hanoin informasaun hosi mídia (…) fó-sai ne’e laloos tanba ne’e sees-aan liuhosi saida mak oras ne’e daudaun ami komandu prosesu hela, kuda sira-ne’e la’ós eis liurai Oe-Leu nia,maibé nia só atu apoiu de’it hodi tau matan de’it ba kuda sira-ne’e tanba nia kamioneta mak tula,” nia imforma ba Jornalista sira iha kna’ar-fatin, Maliana, tersa ne’e.
Komandante PNTL Bobonaro ne’e haktuir, dezde prosesu identifikasaun ne’e la’o, nia parte halo de’it intervista ho Jornalista Rádiu Televizaun Timor-Leste, Empreza Públika (RTTL,E.P) destakadu munisípiu Bobonaro no Rádiu Komunidade Maliana, iha aldeia Teteluri, postu administrativu Cailaco.
Enkuantu kona-bá informasaun ne’ebé publika iha pájina relasaun públiku PNTL no media nasionál balun nia parte la fó komentáriu ruma.
“Ha’u hanoin mídia ne’e iha informasaun balu sira edita mak dalaruma keta sees-aan karik, maibé dezde horisehik ha’u ko’alia de’it iha TVTL, maibe hosi mídia hotu-hotu ha’u seidauk fó informasaun no halo intervista ho ha’u, sira hosi Dili dalaruma telefone ha’u mos la atende, ha’u dehan de’it imi iha Dili karik intervista de’it sira iha Dili, ha’u só bele intervista ho imi iha munisípiu,” nia reforsa.
Notisia Relevante:UPF detein sidadaun na’in-rua hatama mina-rai no sigarru ilegál iha fronteira
Jornalista : Sérgio da Cruz
Editór : Evaristo Soares Martins
