BOBONARO, 20 jullu 2022 (TATOLI) – Polísia Nasionál Timor-Leste (PNTL) Munisípiu Bobonaro, serbisu hamutuk ho ekipa Esplosive Ordnance Disposal (EOD) harahun ona materiál espluzivu ne’ebé komunidade sira identifika iha área Galispalu, suku Lahomea, postu administrativu Maliana, munisípiu Bobonaro.
Komandante Operasaun Polísia Munisípiu Bobonaro, Ispetór Xefe Armando Silva, esplika, materiál hirak-ne’e komunidade sira hetan iha segunda loron 12 fulan-jullu tinan ne’e no harahun iha loron 18 fulan-jullu.
Notísia relevante: Komunidade hetan materiál espluzivu iha Bobonaro
“Ita-nia ekipa hosi EOD hosi Dili mai liuhosi komandu munisípiu Bobonaro, ekipa ida lidera direita hosi xefe operasaun rasik, dezloka kedas ba fatin Galisapulu harahun ona materiál ne’e ita tuku 16:00 lokraik,” nia informa ba Jornalista sira iha kna’ar-fatin, tersa ne’e
Nia akresenta, iha tempu badak sei rekolla tán materiál espluzivu iha postu administrativu haat ne’ebé membru PNTL no komunidade sira identifika no tau ona liña polísia.
“Ami simu tán informasaun foun tama tán katak materiál espluzivu sira-ne’e iha postu administrativu Bobonaro, Lolotoe, Balibo iha Batugade no Lolotoe inklui Atabae ne’ebé iha tempu liubá ita-nia membru sira asegura hela iha ai-tuan laran,” nia relata.
Inspetór Xefe ne’e fundamenta, PNTL munisípiu Bobonaro daudaun ne’e sei rekolla imajen balu no prepara relatóriu atu haruka ba Komandu Jerál atu subemte ba Esplosive Ordnance Disposal nune’e bele halo harahun iha fatin seguru tuir área espesialidade.
Jornalista : Sérgio da Cruz
Editór : Evaristo Soares Martins
