NASIONÁL, SOSIEDADE SIVĺL

La’o Hamutuk partilla rezultadu OBS ba sosiedade sivil

La’o Hamutuk partilla rezultadu OBS ba sosiedade sivil

Logo Lao Hamutuk

DILI, 21 jullu 2022 (TATOLI)—Organizasaun Naun Governamentál (NGO) La’o Hamutuk, kinta ne’e, realiza semináriu kona-ba rezultadu Open Budget Survey (OBS) 2021 hodi partilla ba sosiedade sivil sira.

“Sorumutu ida ohin, atu fahe informasaun ba maluk Sosiedade Sivil sira relasiona ho rezultadu Open Budget Survey. Survey ida ne’ebé realiza hosi parseriu internasionál orsamentu ka Internasionál Budget Parthership, ne’ebé mak fó sai kona-ba rezultadu hosi ita-nia transparánsia, partisipasaun no mós fiskalizasaun. Entaun, ida ne’e la’os to’o de’it ona ba Sosiedade Sivil, maibé ha’u haree iha Ministériu Finansas sira mós públika rezultadu ida ne’e. Maibé, saida mak ami nota katak, sira públika de’it valór ida-ne’ebé transparansia nian 52 por 100, maibé sira haluha atu informa mós ba públiku kona-ba valór partisipasaun Timor-Leste to’o ona iha ne”ebé,” Peskizadora La’o Hamutuk, Elizaria Febe Gomes, hateten ba jornalista sira, iha salaun HAK, Farol, Díli, kinta ne’e.

Objetivu soeumutu ne’e atu sosiedade sivil sira seluk mós informadu kona-ba Timor-Leste nia transparansia no partisipasaun ne’e to’o ona iha ne’ebé, la’ós de’it hela iha nível públikasaun dokumentu, maibé mós ba to’o iha nível koñesimentu, nune’e sosiedade sivil sira bele hatene kona-ba saida mak valór hirak ne’e no saida mak OBS.

Peskiza ne’e mai hosi Internasionál Budget Parthersip sira halo kada tinan rua hodi haree kona-ba sistema orsamentál iha nasaun ida. Entaun, Timor-Leste involve iha ne’ebá inklui mós ho nasaun 120 iha ne’ebá, durante períodu tinan rua.

“Entaun, Timor-Leste hahú kedas partisipa iha survey ida-ne’e hahú hosi 2015 to’o 2021 hanesan ne’e,” nia dehan.

Maske nune’e, rezultadu peskiza ida ne’e ba orsamentu tinan rua, hosi 2020 ba iha nia implementasaun no 2021 ba iha nia prosesu, planeamentu no mós ba implementasaun.

Open Budget Survey (OBS) katak, survey ida ne’ebé halo analiza no monitorizasaun ba iha prosesu orsamentu no sistema orsamentu hahú kedas hosi nia formulasaun to’o nia implementasaun.

Ida-ne’e la’ós envolve órgaun ida de’it maibé nia avaliasaun la haree ba iha órgaun importante sira-ne’ebé mak toma konta ba desizaun orsamentál nian hanesan Governu, Parlamentu Nasionál no Tribunál das Contas.

Kerdizerké mai kedas hosi Governu hahú hosi formulasaun ba iha orsamentu, nune’e ba iha Parlamentu Nasionál hanesan órgaun ne’ebé halo fiskalizasaun, nune’e ikus ba Tribunál das Contas atu halo nia audit.

Entaun, hosi parte sosiedade sivil nian envolve atu haree liu kona-ba sosiedade sivíl hetan disponibilidade no asesu ba iha informasaun no desizaun politika sira-ne’e ka lae, tanba objetivu hosi avaliasaun ida-ne’e atu asegura katak Governu, Parlamentu inklui Órgaun kompetente sira ne’ebé haree kona-ba prosesu no sistema orsamentu ne’e iha duni kompromisu atu fó sai informasaun ba públiku.

Jerente Organizasaun Matadalan Institutu, Benjamin Thomas Pereira, hateten semináriu kona-ba Open Budget Survey ba kada tinan rua dala ida ne’ebé realiza hosi La’o Hamutuk, Organizasaun Matadalan Institutu sente katak ba prosesu transparánsia no partisipasaun públiku iha prosesu elaborasaun orsamentu kada tinan menus tebes.

“Ami sente katak durante ne’e ita sosiedade sívil mós identifika ona katak, iha fundamentu balun ne’ebé mak limita sosiedade sivil. Aleinde ne’e mós públiku nia partisipasaun iha prosesu elaborasaun polítiku públiku sira menus tebes, ida-ne’e tanba mai hosi rezimentu Parlamentu Nasionál iha artigu 80 ne’ebé lahó karakter obrigatóriamente hodi involve sosiedade sívil no públiku tomak iha prosesu debate orsamentu no desizaun polítika ba públiku sira,” nia dehan.

Iha seluk, iha dekretu-lei númeru 43/2016 ne’ebé ko’alia kona-ba asesu dokumentu ofisiál sira, maske dekretu lei iha ona maibé nafatin fó impaktu ba iha partisipasaun públiku sira iha polítika públika nasaun nian.

“Entaun, ami sosiedade sívil sente katak ida-ne’e hamenus ita-nia prosesu transparánsia iha mundu, liu-liu Timor-Leste,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!