DILI, JUSTISA

PNTL detein autór na’in-tolu hadau telemóvel iha kapitál Dili

PNTL detein autór na’in-tolu hadau telemóvel iha kapitál Dili

Membru PNTL halo hela identifikasaun ba suspeitu mane nain-tolu envolve krime públiku ba kazu na’ok no hadau komunidade nia telefone iha Kapitál Dili. Imajen/Media PNTL

DILI, 27 jullu 2022 (TATOLI)– Polísia Nasionál Timor-Leste (PNTL), liuhosi Servisu Informasaun Polísia (SIP) hosi Nasionál halo detensaun ba suspeitu mane nain-tolu ho naran inisiál AJG (tinan 20), LRF (tinan 21) no FCM (idade minoridade).

“Supeitu na’in tolu, durante ne’e envolve krime públiku ba kazu na’ok no hadau komunidade nia telefone iha Kapitál Dili,” refere nota imprensa ne’ebé Agência TATOLI asesu, kuarta ne’e.

Hafoin halo vizilánsia durante oras-ualu nia laran hosi dadeer to’o tuku 12:35, SIP Nasionál deteta uluk suspeitu AJG ho LRF no tenta halai, maibé membru SIP duni tuir no konsege detein uluk LRF iha área Matadouro.

Iha oras 13:00, ekipa hamutuk ho suspeitu L buka tuir hodi detein tan suspeitu AJG iha área Matadouro no foti mós evidénsia motór ida ho marka Honda Beat, koor metan azul xapa matríkula laiha ne’ebé sira uza hodi hadau komunidade nia telefone.

Iha prosesu identifikasaun suspeitu AJG deklara katak, iha semana kotuk nia hamutuk ho nia kolega ida ho naran FCM , hadau telefone ho marka Samsung Galaxi A02, kór metan bainhira telefone nain konduz hela motór iha área Fatuhada-Comoro, besik Warung Sate kambing nia-oin.

Suspeitu A mós deklara,  telefone ne’e nia fa’an ona ba negosiante ida naran MJG iha Matadouro ho folin $70, nune’e ekipa SIP hamutuk ho suspeitu ba foti fali telefone refere inklui nia maluk L iha área Becora.

Relasiona ho kazu ne’e, suspeitu sira deklara la’ós foin maka halo asaun na’ok ne’e, maibé beibeik ona  hahú husi tinan 2019 hamutuk ho nia kolega seluk ne’ebé tama ona iha tarjetu SIP nasionál nian no kontinua buka tuir suspeitu seluk tan ba kazu na’ok motór.

Hafoin halo identifikasaun Ekipa SIP lori ona suspeitu nain-3 inklui evidénsia telefone rua ho motorizada-ida ba iha Seksaun Investigasaun Kriminál, Eskuadra PNTL Dom-Aleixo Comoro hodi kontinua Prosesu investigasaun.

Notísia relevante:  PNTL detein autór baku rahun karreta no foti sasan iha kapitál Dili

Jornalista: Natalino Costa

Editór: Florencio Miranda Ximenes

iklan
iklan

Leave a Reply

iklan
error: Content is protected !!