DILI, 07 jullu 2022 (TATOLI)— Polisia Nasionál Timor-Leste (PNTL), liuhosi Servisu Informasaun Polisia (SIP), detein suspeitu ho naran inisiál LVM (25), hela iha área Caicoli, munisípiu Dili, ne’ebé envolve krime jerál ba kazu baku rahun karreta no foti sasan iha kapitál Dili.
“Servisu Informasaun Polísia (SIP), detein suspeitu LVM ne’e iha Bairru Grillos no iha fatin akontesementu suspeitu deklara nia mak baku rahun no foti duni laptop ida iha areadór Cristo-Rei, baku rahun karreta Delicious hodi foti laptop no telefone ida iha área Sporting kruzamentu Banku Nasionál Utramarinu (BNU,sigla Portugés) tun ba Portu-Dili inklui telefone ida. Enkuantu iha área Audian no Culuhun baku rahun karreta, maibe la konsege foti sasan,” refere nota ne’ebé Agência TATOLI asesu, kuarta ne’e.
Hafoin halo kapturasaun, SIP diretamente entrega kedas Polisia Nasionál Servisu Investigasaun Kriminál, hodi halo prosesu investigasaun no entrega ona ba Komandu Munisípiu Dili hodi halo detensaun durante oras 72, antes submete ba tribunál hodi tuir porsesu julgamentu.
Antes ne’e, suspeitu LVM tama ona prizaun iha tinan 2017 no sai iha tinan 2021 tanba komete kazu hanesan ka na’ok ema nia sasan iha Audian.
Operasaun ida ne’e, realiza tanba halo ona koordenasaun ho autoridade judisiáriu kompetente no oras ne’e daudaun Komandu PNTL hatun ona diretiva ba Komandante SIP hodi intensifika buka tuir autór sira seluk ne’ebe envolve ho kazu hanesan.
Notísia relevante: SM detein sidadaun estranjeiru nain-rua ba kazu falsifikasaun dokumentu Estadu
Jornalista: Natalino Costa
Editór : Florencio Miranda Ximenes
