Top

Manuel Pinto kompromete dezenvolve TATOLI fornese notísia ba públiku ho kualidade

_S1L0127

DILI, 29 jullu 2022 (TATOLI)— Prezidente Konsellu Diretivu Noticiosa de Timor-Leste, Institutu Públiku (TATOLI,I.P), Manuel Pinto, hateten maske ho limitasaun barak, maibé kompromete sei hadi’a no dezenvolve di’ak liután Agência  estatál ne’e atu fornese notísia ba públiku ho lalais, loos no kredivél.

Prezidente Konsellu Direitu hato’o kestaun bainhira sai oradór hodi koa’lia kona-ba “Dezenvolvimentu TATOLI nu’udar institutu públiku agora no ba futuru” iha ámbitu semináriu ho tema: “Reforsa Papél TATOLI, I. P Hodi Hasa’e Koñesimentu Públiku ba Domina Siénsia no Téknolojia liuhosi Informasaun,” ne’ebé realiza iha sekuénsia ba selebrasaun aniversáriu Agência Tatoli, I.P ba da-VI iha loron 27 jullu 2022.

Notísia relevante: MAPKOMS husu Agência Tatoli tenke fó prioridade ba servisu públiku

“TATOLI ho natureza hanesan média estatál,no sempre iha ejizénsia ne’ebé bo’ot husi públiku. Maibé dezafiu boot ba ami mak rekursu umanu no seidauk iha edifisiu própriu ne’ebé maka ami uza atu halo serbisu. Maski ho dezafiu no difikuldade sira ne’e, TATOLI kontinua garante ba nia produtu jornalístiku ho nia públikasaun sira tanba Jornalista TATOLI maioria iha kapasidade no esperénsia hodi asegura kobertura sira sira hodi serbí públiku, Governu no Estadu,” Prezidente Konsellu Direitvu ne’e hateten iha edifísiu TATOLI-Faról, Dili, sesta ne’e.

Durante ne’e, resposavél média Estatál ne’e dehan iha duni ejizénsia barak husi públiku atu TATOLI bele halo nia kobertura atu públiku bele akompaña notísia TATOLI ne’ebé liga ba dezenvolimentu ne’ebé la’o iha Timor-Leste.

“Ha’u hakarak katak ami sempre buka solusaun hodibele enfrenta ejizénsia no dezafiu sira ne’ebé maka iha no ami sei la para maibé sei kontinua hadi’a aan atu fornese informasaun ba públiku,” nia kompromete.

Notísia relevante: Agência TATOLI presiza atualiza an ba téknolojia

Ho nune’e, Prezidente CD agradese ba kritika no sujestasaun sira ne’ebé durante ne’e públiku  lansa tanba sai hanesan sasukat ida,hodi kontinua hadi’a di’ak liután iha futuru.

Alende ne’e, Manuel Pinto husu ba jornalista sira iha Agência TATOLI atu prátika lobi jornalizmu iha serbisu lor-loron hodi asesu informasaun ho lalais, loos no kredivél.

“Lobi jornalizmu ho fonte ita sei falla, maibé ba oin ita sei haree investe ba ida ne’e tanba lobi jornalizmu parte importante ba jornalista sira ita nia personalidade no mós determinasau ba ita nian serbisu liga produtu jornalizmu sira,” nia rekomenda.

Progresu ba públikasaun notísia iha Agência TATOLI mak iha tinan 2017 totál públikasaun notísia iha lian tetun hamutuk 2.000, iha 2018 hasa’e nia públikasaun notísia  iha lian tetun  2163, iha 2019, totál  produsaun notísia sa’e ba 5.000.

Notísia relevante: Padre Bento enkoraja Agência Tatoli fornese notísia favoravél ba públiku

Enkuantu Iha tinan 2020 produsaun notisia tetun  sa’e ba 6.000, notísia lian portugés 1.000-resin. Iha tinan ne’e mós TATOLI haluhan tan públikasaun notisia  ba lian inglés ho total hamutuk 50.

Iha tinan 2021, produsaun notísia tetun iha sa’e ba 9.000, notísia portugés 2.000, ingles 900-resin.

Atribui sertifikadu ba estajiáriu na’in-ualu

Iha ámbitu selebrasaun aniversáriu da-neen Agência TATOLI mós atribui sertifikadu ba estajiáriu sira ne’ebé mak durante  hala’o  estájiu  iha instituisaun ne’e.

Nune’e, representante estajiáriu, Zelia Gouveia Leite hosi Universidade Nasionál Timor Lorosa’e (UNTL), hateten sente kontente tebes no agradese ba atribuisaun sertifikadu ne’e no iha aniveráriu da-neen espera ba oin hala’o ninia servisu hanesan média ne’ebé  mak di’ak no imparsiál hodi fó informasaun ne’ebé kredivél no loos ba sosiedade ba nasaun no mós ba mundu.

“Liuhusi informasaun hosi rai laran no rai li’ur espera bele iha sustetavél nafatin ba komunidade ne’ebé mak hamrook ba informasaun,” nia afirma.

Iha fatin hanesan, Estudante husi Universidade Nasionál Timor Lorosa’e (UNTL), Regiana   da Conceição Xavier, hateten ho aniversáriu TATOLI, I.P ba-neen ne’e nafatin sai matan tilun ba povu hodi fó sai informasaun ne’ebé loos no kredivél ba publiku.

Notísia relevante: Nélio Isaac dezafia produtu Agência Tatoli, I.P foka ba asuntu turizmu

Jornalista : Natalino Costa/Felicidade Ximenes

Editór       : Florencio Miranda Ximenes

Publisidade

Leave a Reply

Latest Post

error: Content is protected !!