DILI, 29 jullu 2022 (TATOLI)— Prokuradór Jerál Repúblika (PJR), Alfonso Lopes, hateten, nia-parte louva Agência Notisioza de Timor-Leste TATOLI Insitutu Públiku (TATOLI, I.P) tanba fó sai informasaun ka notísia sira ne’ebé ho kualidade.
Prokuradór Jerál Repúblika ne’e hato’o kestaun ne’e relasiona ho aniversáriu Agência Tatoli, I.P ba da-VI iha loron 27 jullu 2022.
“Parabéns TATOLI. Tanba ita bo’ot hato’o ona notísia ne’ebé mak kualidade,” Prokuradór Jerál Repúblika ne’e hato’o mensjen ne’e ba Agência Tatoli, iha nia knaaar fatin, Colmera, sesta ne’e ohin.
PGJ Alfonso nota durante públikasaun notísia sira hosi Agência TATOLI laiha problema tanba notísia sira ne’ebé públiku ho imparsiál no kredivél
“Durante ne’e, Agência TATOLI halo nia serbisu ho di’ak tebes hodi fornese ona informasaun ba ita nian públiku. Ita boot sira kontribui ona prosesu dezemvolvimentuTimor-Leste nia,” nia afirma.
Alfonso Lopes mós agradese ba TATOLI ne’ebé durante nia mandate koopera di’ak tebes hodi kobre atividade PGR nian hodi fó sai públiku.
Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.
Jornalista: Natalino Costa
Editór : Florencio Miranda Ximenes
