Top

DNOU nota kompañia sira soe lixu barak liu iha kontentór

Ekipa saneamentu raut hela lixu iha área Imajen Tatoli/António Daciparu.

DILI, 08 agostu 2022 (TATOLI)—Diretora Nasionál Organizasaun Urbana iha Ministériu Adminsitrasaun Estatál (DNOU–MAE), Maria Gorete Marques Belo, hateten durante ne’e DNOU observa no nota katak kompañia sira-ne’ebé mak loke loja mak kontribui soe barak liu lixu iha kontentór ne’ebé mak Governu oferese.

 

Notísia Relevante: Saneamentu rekoñese seidauk bele rezolve problema lixu iha Dili

“Ita nota iha realidade loron-loron nian, la’ós komunidade sira mak soe lixu barak maibé dala barak kompañia ka loja mak aproveita liu tiha fali kondisaun ne’ebé mak Governu fornese,” Maria Gorete hateten ba Agência Tatoli iha na kna’ar fatin Colmera, Dili, segunda ne’e.

Maibé, nia dehan, tuir loloos loja sira-ne’ebé mak faan sasán ne’e tenke lori sira-nia lixu ba iha lixeira Tibar maibé realidade sira mak soe lixu barak liu iha kontentór doméstika nian.

“Ida-ne’e mak difikuldade ne’ebé ita enfrenta, mezmu ita-nia autoridade Dili kontinua halo avizu, halo aproximasaun ba loja hodi esplika atu uza sira-nia rekursu hodi transportea sira-nia lixu ba lixeira Tibar,” nia dehan.

Tuir nia, la’ós loja hotu-hotu la kumpre maibé iha loja balun mak la halo tuir regra ne’ebé Governu fó sai no ba loja na’in no komunidade ne’ebé soe lixu arbiru, iha Dekretu-Lei 2/2017, iha ne’ebá hakerek mós kona-ba sansaun ne’ebé tenke aplika ba sé de’it mak la kumpre, maibé atu aplika sansaun refere MAE sei haree tanba kada munisípiu iha nia regulamentu própriu ida-idak nian.

Notísia Relevante: AMD sei koloka kaixote lixu 4000 iha sidade Dili

“Ida-ne’e mak ita sei hein hela tanba iha rejime transitóriu hosi Dekretu-Lei ida-ne’e rasik hateten katak regalia hirak-ne’e aplika bainhira kondisaun sira priense hotu ona,” nia dehan.

Tanba ne’e, presiza kompleta tan kondisaun sira-ne’e maibé ida-ne’e la kle’ur tan tanba parte asesor jurídiku sira sei haree hela sirkulár ida, nune’e bainhira ema la kumpre regra soe lixu iha lixeira tenke aplika sansaun.

“Agora daudaun asesór jurídiku sira sei elabora hela no sei iha faze elaborasaun nia-laran,” Gorete hateten.

Aleinde ne’e, iha komisaun organizadora balun ne’ebé halo festa maibé bainhira festa hotu komisaun laiha konsiénsia hodi hamoos lixu molok atu fila ba sira-nia uma mós sei kontribui ba aumentu lixu iha sidade Dili.

Kontentór 450 mak daudaun ne’e Governu tau iha kapitál Dili no totál komioneta iha Dili hamutuk 50 mak sei tula lixu ba lixeira Tibar ho totál pesoal saneamentu na’in-200 resin.

Notísia Relevante: Governu prevee millaun $18 mellora jestaun lixu iha Dili

Jornalista : Osória Marques

Editór     : Cancio Ximenes

Publisidade

Leave a Reply

Latest Post

error: Content is protected !!