EDUKASAUN, HEADLINE

FDCH entrega estudante rua hala’o estájiu profisionál iha Agência Tatoli, I.P

FDCH entrega estudante rua hala’o estájiu profisionál iha Agência Tatoli, I.P

Prezidente Konsellu Diretiva Agência Tatoli, I.P, Manuel Pinto, esplika kondisaun no fó informasaun jerál instituisaun ba reprezentante FDCH no estajiáriu na’in-rua molok simu halo estájiu durante fulan-neen, iha edifísiu Agência Tatoli, I.P, Farol, tersa (09/08). Imajen Tatoli/Joanico Araújo

DILI, 09 agostu 2022 (TATOLI)—Fundu Dezenvolvimentu Kapitál Umanu (FDCH, sigla portugés), tersa ne’e, entrega mellór estudante rua naun bolseiru, hodi hala’o estájiu profisionál iha Agência Noticiosa de Timor-Leste-Tatoli, Institutu Públiku (Agência Tatoli, I.P), durante fulan-neen.

Estudante rua ne’e mak hanesan Fernando Marçal hosi Institute of Bussiness (IOB) fakuldade kontabilidade departamentu ekonomia no jestaun, hanesan graduadu ho indeks prestasaun komulativu (IPK) 3,15 no Abelita Ximenes Moreira hosi Instituto Profissional de Canossa (IPDC) fakuldade ekonomia departamentu jestaun administrativa, hanesan graduadu ho IPK 3,02.

Xefe Departamentu Mídia no Relasaun Públiku FDCH, Joanico Domingos Guterres, hateten, estajiáriu na’in-rua ne’e sei halo estájiu hodi manán esperiénsia molok sira aplika ba vaga ruma.

“Durante ita-nia estajiáriu sira halo estájiu durante fulan-neen iha Agência Tatoli ne’e, sira sei hetan fasilidade. Dirijente sira iha ne’e sei fó fatin, espasu ba sira no sei orienta atu halo serbisu tanba estájiu ne’e atu lori sira apreende buat ruma,” Xefe Departementu hateten nia iha serimónia entrega mellór estudante, iha edifísiu Agência Tatoli, I.P, Farol, tersa ne’e.

Notísia relevante: Instituisaun 13 prontu simu estudante 445 hala’o estájiu profisionál

Xefe Departamentu Mídia no Relasaun Públiku FDCH, Joanico Domingos Guterres, entrega dokumentu kooperasaun ba Prezidente Konsellu Diretiva Agência Tatoli, I.P, Manuel Pinto, iha edifísiu Agência Tatoli, I.P, Farol, tersa (09/08). Imajen Tatoli/Joanico Araújo

Programa estájiu profisionál ba mellór estudante naun bolseiru ne’ebé FDCH realiza, ho objetivu atu ajuda estudante sira bele apreende no hetan esperiénsia, atu nune’e bainhira sira hakarak konkorre ba vaga ruma, bele iha ona esperiénsia serbisu.

“Programa estájiu profisionál ne’e atu absorve estajiáriu sira iha merkadu traballu iha rai-laran, maibé FDCH sei la garante atu fó serbisu ba sira. Hosi prosesu estájiu ne’e maka instituisaun ruma nesesita hakarak rekruta sira di’ak liután, tanba sira nu’udar mellór estudante ne’ebé tama iha klasifikadu top 10,” Reprezentante FDCH esplika.

Programa estájiu profisionál nu’udar faze dahuluk ba estudante mellór klasifikadu naun bolseiru iha instituisaun ensinu superiór iha rai-laran, ne’ebé hosi etapa dahuluk FDCH halo ona publikasaun naran hamutuk 305, maibé foin koloka 200 resin ba iha instituisaun hamutuk 35 inklui Agência Tatoli, I.P no durante estájiu nia laran estajiáriu sira sei hetan subsídiu $150 kada fulan.

“FDCH halo kontratu ho estajiáriu sira atu la kesi sira-nia liberdade. Karik durante períodu estájiu maka Agência Tatoli loke vaga ruma, sira bele aplika ou iha konkursu públiku ruma loke sira sei bele hatama vaga hodi kompete,” nia tenik.

Iha biban hanesan, Prezidente Konsellu Diretiva Agência Tatoli, I.P, Manuel Pinto, agradese ba FDCH tanba hili ona sai instituisaun ne’ebé atu implementa polítika Governu liuhosi programa estájiu profisionál ba mellór estudante.

“Hosi programa ida-ne’e, Agência Tatoli hein katak kooperasaun ne’e bele di’ak liután iha futuru. Ha’u hakarak dehan, Tatoli iha kondisaun edifísiu temporáriu ne’ebé ita bele uza tuir nesesidade ne’ebé iha,”  nia dehan.

Nia haktuir, molok ne’e mídia estatál ne’e simu mós estajiáriu lubuk ida hosi universidade no instituisaun mídia sira.

“Sira mai iha ne’e la uza fasilidade ho másimu tanba Tatoli ho kondisaun no fasilidade limitadu, tanba ne’e karik iha tempu estájiu nia laran maka hasoru situasaun ladún di’ak, labele hanoin katak FDCH lori estajiáriu sira mai soe hela iha fatin la dignu,” Prezidente Konsellu Diretivu Agência Tatoli, I.P dehan.

Maski nune’e, nia garante katak estajiáriu na’in-rua sei hetan orientasaun hosi funsionáriu sira no sei hetan esperiénsia balun.

“Durante períodu estájiu fulan-neen ne’e hotu maka estajiáriu na’in-rua foin bele aplika vaga ruma ka dentru estájiu nia laran iha vaga ruma sira bele aplika,” nia akresenta.

Nune’e mós, Estajiáriu mellór estudante hosi IOB, Fernando Mendonça, konsidera programa ne’e nu’udar oportunidade ida atu manán esperiénsia hodi kompete iha kampu traballu.

“Ami seidauk iha esperiénsia naton, ami mai atu buka esperiénsia. Tanba ne’e agradese tebes ba FDCH no Agência Tatoli, I.P ne’ebé halo ona kooperasaun di’ak hodi ohin bele entrega no simu ami hodi hala’o estájiu,” nia tenik.

 Jornalista   : Tomé Amado   

Editora         : Julia Chatarina

iklan
iklan

Leave a Reply

iklan
error: Content is protected !!