BTL konstrui sistema bomba tratamantu bee iha Lahomea

BOBONARO, 10 agostu 2022 (TATOLI) – Bee Timor-Leste, Empreza Públika (BTL,E.P) hahú konstrui sistema tratamentu bee ka water treatment pump iha aldeia Lesupun, suku Lahomea, postu administrativu Maliana, munisípiu Bobonaro.

Diretór BTL,E.P munisípiu Bobonaro, Adriano da Cruz, esplika planu ba konstrusaun refere tuir loloos hahú dezde 2018, maibé kestaun pandemia glovál Covid-19 impede prosesu hotu, entaun implementa iha tinan 2022 ne’ebé dadaun ne’e iha ona faze cor aliserse.

Nia dehan, materiál sira hanesan plat water treatment sosa hosi Surabaya, Indonézia, ne’ebé oras ne’e hatún ona iha fronteira Atapupu, munisípiu Belu, provínsia Timor Osidentál NTT, sigla indonéza), Repúblika Indonézia no balun sei iha faze mobilizasaun.

Notísia relevante: BTL,EP Bobonaro sei mellora sistema bee-moos ho kualidade

“Ohin, tuir loloos atu halo ninia pengecoran iha fatin ida-ne’e, maibé tanba iha inspesaun hosi tékniku BTL sentrál, mai haree buat balun seidauk preparadu hosi kompañia, tanba ne’e agora sei halo preparasaun másimu aban mak foin halo pengecoraan,” nia informa ba Jornalista sira, kuarta ne’e hafoin observa konstrusaun ne’e.

Diretór ne’e dehan, objetivu hosi establesimentu sistema bomba refere atu apoia sistema gravitasaun bee-moos urbana hanesan Beremau, Galisapulu, Aikumu, Lugululi no Atugalai bainhira akontese bee menus iha  tempu bailoron naruk.

Nia akresenta, sistema ne’e kapta direita bee hosi mota Bulobu ulun ho volume 25 litru por segundu hodi apoia dsitribuisaun ba tanki rezervatóriu iha Santa Cruz no pemancar suku Lahomea, hafoin distribui ba konsumidór sira iha kapitál Maliana.

Maibé tuir Adriano katak, sistema refere sei halo separasaun ho operadór liña transmisaun hosi irrigasaun Maliana I, atu evita bainhira mota tún fornesimentu bee-moos ba kliente sira funsiona normál.

“Sistema tratamentu ne’e, primeiru atu hasa’e kuantidade ka volume bee, no tempu hadi’a kualidade, tanba sistema ne’e mai ho ekipamentu kompletu, laboratóriu no mini laboratóriu establese iha fatin ne’e, hodi kontrola kualidade bee-moos bainhira distribui ba kliente sira,” nia hateten.

Tuir kontratu konstrusaun ne’e sei finaliza iha fulan-setembru 2022, maibé diretór ne’e afirma dalaruma hasoru obstákulu ne’ebé presiza konsidera tanba materiál sira maioria importa hosi Indonézia.

Obra refere responsabliza hosi empreza Lavida Unipesoál Lda ho totál orsamentu rihun $530.

Notísia relevante: BTL, E.P sei identifika problema bee-moos iha eskola EBC Beco 

Sistema gravitasaun Beremau hetan estragu

Iha parte seluk, Diretór BTL,E.P munisípiu Bobonaro ne’e fó-sai katak, sistema gravitasaun Beremau la funsiona 100% tanba hetan estragu, nune’e kauza distribuisaun bee-moos ba konsumidór sira  iha suku Holsa no aldeia ida iha suku Odomau, postu administrativu Maliana.

“Ami rekoñese ida-ne’e, ha’u hanoin la’ós semana ida ka rua, besik tinan ida ona, tanba sistema Beremau la mai 100% tanba kestaun udan-boot ita hatene sistema Beremau laiha tanki sedimentasaun, bainhira udan boot bee sei la mai, ita foti iha mota mós nia efeitu ba kualidade bee merak,” nia akresenta.

Nia haktuir, sistema sira ne’e hatan estragus hafoin akontese inundasaun iha tinan kotuk rezulta rai halai estraga hotu sistema lina distribuisaun, inklui atitude komunidade balu ne’ebé halo to’os besik liña transmisaun no hasai ilegál la hetan autorizasaun hosi operador BTL,E.P.

“Ha’u katak semana oin ita sei ba hadi’ak, halo soldadura ba sistema sira-ne’e, depois kontinua asegura distribuisaun bee-moos ba aldeia sira-ne’ebé mak agora daudaun iha hela preokupasaun ba bee-moos ne’ebé dalaruma sai ka la sai liu,” nia promete.

Sorin seluk, komunidade aldeia Bilicou, suku Holsa, Manuél Soares, preukupa ho bee-moos, liuliu uza ba nesesidade kada loron.

“Ami durante ne’e sente araska loos, dalaruma bee ne’e sai loron ida, depois loron tolu ka haat hanesan mak sai fali, to’o ami uza ba hemu nian laiha, ba kuru fali iha bee-matan,” nia hateten.

Nia husu ba BTL,E.P atu halo intervensaun lalais ba sistema gravitasaun Beremau ne’ebé hetan estragu, nune’e distribuisaun bele normál hikas, atubele uza ba nesesidade.

Suku Holsa iha aldeia neen mak haneasan, Solugolo, Bilicou, Secar, Lolo-oa, Taz no Oplegul ho totál populasaun 7,967 kompostu hosi mane 3,929, feto 4,038, ho totál xefe família 1.802.

Notísia relevante: IDN kanaliza bee-moos ba uma-kain 359 iha Ilat-laun Marobo

Jornalista   : Sérgio da Cruz

Editór         : Evaristo Soares Martins