EKONOMIA, HEADLINE, MUNISÍPIU, OÉ-CUSSE (RAEOA)

Timor Gap sei harii estasaun kombustível iha RAEOA

Timor Gap sei harii estasaun kombustível iha RAEOA

OÉ-CUSSE, 11 agostu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e realiza diskusaun ho empreza estatál Timor Gap atu harii estasaun kombustível ida iha Oé-Cusse hodi garante seguransa enerjétika iha rejiaun ne’e.

Nune’e hafoin remata enkontru kortezia, Prezidente Timor Gap, António de Sousa, informa, nu’udar empreza Estadu iha responsabilidade atu hakbesik dezenvolvimentu setór petróleu iha rejiaun ne’e.

“Timor Gap hanesan empreza estatál, povu Timor-Leste nian, entaun RAEOA mós na’in ba Timor Gap, nune’e ami iha responsabilidade boot atu lori dezenvolvimentu setór petróleu atu garante seguransa enerjétika nasionál mai Oé-Cusse, ne’ebé ohin prezidente mós apoia tebes, ita hein katak tempu badak realiza misaun ne’e, atu dezenvolve, harii la’ós postu abastesimentu maibé seguransa enerjétika iha Oé-Cusse,” António de Sousa, informa ba jornalista sira iha Gabinete ZEESM Oé-Cusse, kinta ne’e.

Prezidente Autoridade RAEOA, Arsénio Paixão Bano, hatete, objetivu atu estabelese iha Oé-Cusse, importante tebes atu asegura kombustível labele menus iha povu Oé-Cusse.

“Diskusaun ohin ne’e importante tebes, ita sei haree nia konkretizasaun iha tempu badak, maibé RAEOA interesadu tebes atu serbisu hamutuk ho Timor-Gap, atu harii estasaun kombustível iha Oé-Cusse, ne’e joint investmentu Oé-Cusse mós tama hanesan sósiu, ida-ne’e atu asegura mina labele menus ba autoridade no públiku,” nia katak.

Arsénio Paixão Bano orgullu tanba Timor-Gap iha esperiénsia barak ona, maske la’ós iha tempu naruk maibé Timor-Gap iha ona estasaun barak, hanesan kombustívélel iha Suai, entaun esperiénsia ne’e bele transfere mai iha Oé-Cusse.

“Entaun ita espera iha fulan ne’e to’o fulan oin ita bele hahú ona, definisaun rai atu iha fatin ne’ebé, ne’e loos ona, estudu parese iha ona proposta tanba orsamentu ba RAEOA prontu,” nia afirma.

Jornalista : Abílio Elo Nini
Editór : Evaristo Soares Martins

iklan
iklan

Leave a Reply

iklan
error: Content is protected !!