BAUCAU, 12 agostu 2022 (TATOLI) – Eskola sira iha munisípiu Baucau hahú hikas implementa programa merenda eskolár faze daruak iha fulan-jullu to’o setembru ho durasaun ezekusaun loron-35.
Diretór Servisu Munisipál Edukasuan Baucau, Augosto Ornai Ximenes, esplika, orsamentu faze daruak ba programa refere transfere ona ba konta bankária kada ensinu báziku sira tuir aprovasaun orsamentu ne’ebé aloka ba Baucau ho durasaun loron efetivu 35, hodi kompleta loron ezekusaun hamutuk 70.
“Orsamentu transfere no eskola sira foti hotu ona, foin daudaun ita ezekuta iha fulan-jullu durante loron-lima,” Diretór Servisu Munisipál Edukasaun Baucau hateten iha Vila Nova, sesta ne’e.
Faze daruak sei ezekuta tán orsamentu hamutuk rihun $357.093, ho dursaun loron-35 komposta fulan-jullu durante loron-lima, agostu durasaun loron ezekusaun 10 no setembru loron-20 iha períodu datoluk hodi kompleta ezekusaun orsamentu programa merenda eskolár ne’ebé aloka ba Baucau hamutuk $ 714.187.
Augosto Ximenes argumenta, programa refere latuir kalendáriu efetivu merendá eskolár nian ne’ebé hamutuk loron-191 tanba alokasaun orsamentu merenda eskolár ba tinan-2022 iha Baucau hamutuk loron-70.
Durante implementasaun faze dahuluk rejista lakuna hanesan menus ekipamentu te’in hanesan bikan, kanuru, dapur laiha inklui iha eskola balun menus bee-moos.
Maske nune’e, edukasaun Baucau rejista preokupasaun hosi dirijente eskola sira kona-ba fasilidade hanesan dapur no husu atubele implementa programa refere tuir kondisaun eskola idak-idak hanesan harii dapur provizóriu hodi hein solusaun hosi nasionál.
Tótal eskola ne’ebé sai benefisiáriu hamutuk 209, komposta hosi ensinu pre-primária 29, ensinu bázika públiku hamutuk 111 no ensinu bazika katólika hamutuk 67, hosi totál estudante 32.307.
Jornalista : Natalino Belo
Editór : Evaristo Soares Martins
