DILI, 13 agostu 2022 (TATOLI)—Sekretáriu Ezekutivu Konsellu Nasionál Juventude Timor-Leste (CNJTL-sigla portugés), Mateus Lemos Soares, hateten iha selebrasaun loron internasionál juventude ka International Youth Day 2022 ne’ebé mundu selebra kada loron 12 agostu ne’e hatudu katak joven Timor-Leste hahú fó kontribuisaun ba dezenvolvimentu nasionál.
“Joven sira komesa kria ámbitu ida-ne’ebé kompetetivu maibé ho saudável. Sira aprezenta ideia inovativu sira ba negósiu desportivu nian, ne’ebé ligadu ho atleta futeból nian nomós iha desportista balun ne’ebé partisipa iha eventu Internasionál. Ho ida-ne’e ha’u hakarak parabeniza ba joven hotu-hotu iha loron espesiál ne’e,” Mateus Lemos Soares, hateten hateten ba Agência Tatoli, bainhira partisipa loron internasionál juventude ho tema”Solidariedade Interjerasionál: Kria Mundu ba Otas Hotu-Hotu”.
Diretór Ezekutivu ne’e esplika katak joven sira tenke kontribui ba dezenvolvimentu nasionál hodi manifesta identidade, kultura no vizaun koletiva atu sai ajente hodi hamenus efeitu hosi altersaun iklima, krize ekonómika, dezempregu no kriminalidade organizadu.
“Timoroan tenke manifesta nia identidade, ninia kultura, no ninia vizaun koletiva nune’e atu sai ajente ba globál iha direitu umanu ne’ebé ho respeitu,” nia esplika.
Durante ne’e CNJTL fó ona formasaun iha área lideransa, sidadania, no kona-ba língua portugeza no ingleza nian ba joven hamutuk 2.118 ne’ebé mak hetan ajuda hosi parseiru Internasionál.
Liga ho asuntu ne’e, atleta timoroan vensedór ba medalla tolu hosi ASEAN Para Games 2022, Teófilo Freitas, hateten katak joven hotu-hotu hamutuk no fiar katak joven mak sai ajente ba dezenvolvimentu nasionál.
“Joven sira hotu tenke estuda makaas nune’e halo prátika ba buat hotu ne’ebé aprende ona no hatudu ita-nia esperitu voluntarizmu,” nia sujere.
Loron Internasionál Juventude ka International Youth Day ne’ebé selebra iha kada loron 12 agostu kada tinan ne’e, Nasaun Unida aprova rekomendasaun hosi Woprld Conference of Minister Responsible for Youth hodi deside iha loron 17 dezembru 1999.
International Youth Day ne’e selebra dahuluk iha loron 12 agostu 2000 no iha biban ne’ebá ne’e selebrasaun loron internasiuonál juventude ne’e sai maiu ida atu eduka populasaun, mobiliza joven iha vida políika no eduka joven sira atu promove rekursu umanu hodi resolve problema globál.
Nasaun Unida anunsia tema International Youth Day 2022 ne’e ho titulu Solidariedade Interjerasionál: Kria Mundu Ba Otas Hotu-Hotu”, signifika atu atinje dezenvolvimentu sustentavel, mundu presiza utiliza potensilidade juventude sira-nian hosi jerasaun hotu-hotu.
Jornalista : Osória Marques
Editór : Cancio Ximenes
