Abitante 165 iha Usitaku Nítibe seidauk asesu infraestrutura bázika
OÉ-CUSSE, 15 agostu 2022 (TATOLI) – Xefe suku Usitaku, Hilario Babo, fó sai katak, komunidade hamutuk 165 ba uma-kain 60-resin, iha aldeia Kuantua, suku Usitaku, sub-rejiaun dezde era okupasaun to’o faze ukan-aan seidauk asesu infraestrutura bázika hosi Governu.
“Ha’u-nia komunidade iha Usitaku, liuliu aldeia Kuantua dezde uluk to’o ita ukun-aan sira seidauk asesu liña eletrisidade, bee-moos, saúde, edukasaun no estrada, ita ko’alia kona-bá edukasaun, oan sira ba eskola, la’o tun ba iha aldeia Bona, kuaze kilómetru 4, inan isin-rua sira kuandu partu, atu lori ba klínika Baoknana mós distánsia dook, entaun difikulta tebes populasaun iha fatin ne’e, inklui ferik katuas sira kuandu moras, susar tebes atu asesu ba sentru saúde no klínika,” Hilario Babo, aprezenta iha diálogu komunitária ho autoridade RAEOA, sábadu semana kotuk.
Pedro Name Coa, nu’udar komunidade hosi bairru Kuantua, sente triste, tanba hahú okupasaun nia tempu to’o implementasaun mega projetu ZEEMS tama iha Oé-Cusse, maibé komunidade iha Pante Makasar mak sente, enkuantu iha parte foho to’o agora seidauk iha mudansa.
“Iha 2016 eletrisidade hahú tama iha Oé-Cusse, maibe to’o ohin loron ami iha suku Usitaku, liuliu iha bairru Tualeu no Kuantua, totál populasaun hamutuk 165 ba uma-kain 60-resin, sei uza nafatin lampu oan iha tempu kalan, ami senti ita seidauk ukun-aan hanesan uluk,” Pedro Coa hateten.
Tuir nia, preokupasaun ne’e komunidade hato’o ba iha autoridade RAEOA dezde tinan kotuk maibé to’o agora seidauk iha rezultadu kona-bá preokupasaun ne’e.
“Ita haree ba realidade dezenvolvimentu hosi projetu ZEESM ne’e benefísia ba iha Pante Makasar de’it, maibé komunidade sira iha foho sei halerik ba estrada, edukasaun, saúde, bee-moos, no eletrisidade, mumentu ne’ebá ami hato’o ona ba autoridade maibé lahatene bainhira mai ajuda ami kona-bá ami-nia problema,” nia espera.
Prezidente Autoridade RAEOA, Arsénio Paixão Bano, promete sei responde iha tempu badak, tanba dezenvolvimentu iha RAEOA tinan ne’e sei kobre hotu área rurál sira, kona-bá infraestrutura bázika.
“Ohin ,ha’u halo diskusaun ho komunidade, sira husu kona duni realidade, ohin sira husu atu hadi’a bee-matan, dada liña eletrisidade, edukasaun, klínika ida inportante, tanba ha’u dehan, ita-nia komunidade sira iha Kuantua lalika baruk, ha’u promete tempu badak ha’u sei orienta tékniku sira atu mai haree, saida mak atu dezenvolve uluk iha bairru ne’e,” nia promete.
Nune’e ezekutivu ne’e, informa, kona-bé liña eletrisidade, sei rezolve iha tinan ne’e, tanba Oé-Cusse fatin izoladu sira kuaze asesu ona, no sira-ne’ebé rezidénsia dook hosi rede distribuisaun sei fasilita ho solar panel hodi hein prosesu tuir mai.
“Ita-nia tékniku sira hosi EDTL sei mai atu sukat halo kalkulasaun, atu gasta osan hira depois maka ita halo planu, ba eskola mós ita tenke mai identifika uluk ba rai, tanba dala barak komunidade balu lakohi kontribui atu entrega rai ba Estadu halo dezenvolvimentu, entaun ne’e difikulta ita-nia serbisu atu halo kontrusaun ruma,” nia katak.
Bazea dokumentu cesta bázika 2021 nian, totál populasaun iha suku Usitaku hamutuk 3,042, komposta hosi aldeia Kuantua, Nítibe, Fatunababu, no Oamna.
Jornalista: Abílio Elo Nini
Editór: Evaristo Soares Martin
