VIQUEQUE, 15 agostu 2022 (TATOLI)–Grupu agrikultura hosi Asosiasaun Haburas Fini, iha époka tinan 2022, hahú kolleta hare ho variedade hanesan nakroma ho ektare ualu, iha Bebui, suku Afaloikai, postu administrativu Uatulari, munisípiu Viqueque.
“Asosiasaun Haburas Fini ne’ebé durante ne’e sai produtór komersiál fini hahú moris iha tinan 2016, nune’e kada tinan asosiasaun prodús hare fini variedade nakroma tonelada 15,” Vise-Prezidente Asosiasaun Habuaras Fini, Amerco Amaral, hateten, iha natar Afalokia, segunda ne’e.
Notísia relevante: MAP kolleta hare iha rai ektare 17 suku Fahi-Ria Aileu
Tuir Vise-Prezidente Asosiasaun, nia parte seidauk hatene rezultadu tanba foin ko’a hare.
“Ko’a hotu mak sama tiha maka ami bele hatene loloos rezultadu produsaun iha tinan ne’e. Kada tinan ami sempre hetan rezultadu tonelada 15, maibé tinan ne’e ami seidauk hatene sei hetan tonelada 15 ka lae. Tuir ami-nia alvu ba tinan 2022 ami tenke hetan tonelada 15,” nia akresenta.
Governu liuhosi Ministériu Agrikultura no Peska (MAP) kada tinan sempre sosa fini nakroma hodi distribui ba munisípiu seluk inklui munisípiu Viqueque.
“Govermu liuhosi MAP mai sosa ami-nia hare fini ne’e ho presu kada kilograma $15. Maibé ami sente presu $1,50 ne’e kiik liu. Se bele Governu hasa’e presu kilograma ida ba $20,” nia sujere.
Aleinde ne’e, dezafiu ne’ebé asosiasaun hasoru maka ai-moruk hodi hasoru bakteri ne’ebé mai estraga hare hanesan lakataru maibé laiha ai-moruk salva hare.
“Dezafiu ne’ebé ami hasoru maka ai-moruk tanba ami laiha ai-moruk hodi kontra lakataru, tanba lakataru kada tinan sempre estraga ami-nia hare. Ho oportunidade ne’e ami hakarak husu Governu fasilita ami liu-liu ai-moruk hodi ami bele salva ami-nia hare, ne’ebé prodús tanba produsaun fini ne’e programa Governu. Bainhira MAP distribui fini, fahe mos ai-moruk no adubu ba ami atu ami bele uza tanba dalaruma ai-moruk to’o tarde peste estraga tiha ona,” nia tenik.
Vise-Prezidente Asosiasaun fó hanoin, atu hasa’e produsaun fini, maka Governu liuhosi MAP presiza distribui ai-moruk no adubu hodi hasa’e rezultadu fini.
Maski asosiasaun hasoru dezafiu oin-oin maibé rezulta produsaun ne’ebé asosiasaun sira hetan fó benefisia ba membru asosiasaun sira hodi selu oan sira-nia eskola no halo uma.
“Ami hasoru dezafiu ba produsaun, maibé sente kontente tanba hosi rendimentu ne’ebé hetan fó benefisia ba ami selu oan sira-nia eskola no halo ami-nia uma. Membru Asosiasaun Haburas Fini iha suku Afaloikai hamutuk 25,” nia aprezenta.
Jornalista : Vitorino Lopes da Costa
Editora : Julia Chatarina
