BAUCAU, 17 agostu 2022 (TATOLI) – Servisu Munisipál Edukasaun Baucau kuarta ne’e, nomea kargu foun diretiva eskola hamutuk na’in-70.
Diretór Servisu Munisipál Edukasaun Baucau, Augusto Ornai Ximenes, esplika, responsável na’in-70 refere kompostu hosi kargu diretór eskola, adjuntu diretór no gabinte apoia tékniku (GAT) hosi ensinu báziku,ensinu tékniku vokasionál no ensinu sekundária jerál.
“Hand over ne’e halo tanba iha ona nomeasaun foun tanba mandatu diretiva eskola sira-ne’e kleur ona, hahú hosi 2011 mai to’o 2021,” Diretór Servisu Munisipál Edukasaun Baucau hateten iha Vila Nova, kuarta ne’e.
Antes ne’e, kargu diretiva eskola ne’ebé asume hosi diretór sesante sira durante ne’e halo estensaun hodi asume responsabilidade iha kada eskola sira durante tinan-12.
Nomeasaun kargu foun diretiva eskola bazea ba dekretu-lei númeru 7/2010 kona-ba rejime jurídiku administrasaun no jestaun ensinu báziku no 33/2011 kona-ba kona-ba rejime jurídiku administrasaun no jestaun ensinu sekundária ne’ebé hateten mandatu kargu diretiva ho duransaun tinan-rua no sei estensaun ba dala-ida de’it.
Alende ne’e, edukasaun Baucau nomea mos kargu foun ba superintendente edukasaun Baucau na’in-ida no servisu inspesaun eskolár nain-neen hosi postu postu administrativu neen iha munisípiu Baucau.
Superintendente edukasaun Baucau foun, Domingos Guterres, prontu hala’o kargu servisu inspesaun nian iha servisu munisipál edukasaun Baucau no husu ba superintendente sesante atu kontinua serbisu hamutuk hodi hadi’a kualidade edukasaun nian.
“Ami presiza tebes responsável sesante sira-nia tulun atu akonpaña ami-nia serbisu,” Domingos Guterres akresenta.
Jornalista : Natalino Belo
Editór : Evaristo Soares Martins
