KAPITÁL, NASIONÁL

Governu sei implementa materia istória iha kurríkulu ensinu

Governu sei implementa materia istória iha kurríkulu ensinu

Centro Nacional Chega (CNC), kuarta ne’e, hamutuk ho Ministériu Ensinu Superior Siénsia no Kultura (MESSK) realiza semináriu atu implementa matéria istória iha kurríkulu iha ensinu. Imajen/Mídia CNC.

DILI, 17 agostu 2022 (TATOLI)—Centro Nacional Chega (CNC), kuarta ne’e, hamutuk ho Ministériu Ensinu Superior Siénsia no Kultura (MESSK) realiza semináriu ho tema “Istória no Unidade Kurrikulár Institusionál sira seluk iha Kurríkulu Nasionál Foun ba Ensinu Superiór iha Timor-Leste”.

Semináriu ne’e realiza ho objetivu atu informa ba Institutu Ensinu Superiór sira iha Timor-Leste kona-ba esforsu ne’ebé CNC halo hela hodi dezenvolve módulu ida ba Ensinu Superiór ne’ebé bazea ba konteúdu no rekomendasaun hosi relatóriu CAVR “Chega!”, nune’e Governu sei implementa matéria istória iha kurríkulu ensinu.

“Ida ne’e, ami halo hahú hosi ensinu báziku, ensinu sekundáriu no kontinua ho ensinu superiór. Entaun oportunidade ida-ne’e ba CNC ne’ebé di’ak tebes atu responde ba mandatu tuir lei-ne’ebé mak fó ba CNC no mós programa prioridade VIII Governu Konstitusionál nian, entaun hakarak agradese ba Ministériu Ensinu Superiór Siénsia no Kultura ba Universidade sira-ne’ebé partisipa iha elaborasaun kurríkulu ida-ne’e. Ha’u hanoin ho ita-boot sira-nia komentáriu hein katak bele melhora oinsá mak CNC dezenvolve ida-ne’e, nune’e depois ita hein katak iha tinan oin mai matéria ida-ne’e bele sai duni unidade kurríkulu ida iha Ensinu Superior sira,” Diretór Ezekutivu Centro Nacional Chega (CNC), Hugo Maria Fernandes, hateten liuhosi nia diskursu iha semináriu ne’ebé hala’o iha salaun Centro Nacional Chega (CNC), Balide, Dili, kuarta ne’e.

Nia hato’o agradeseimentu ba JIZ, tanba JIZ hanesan Centro Nacional Chega nia parseriu ne’ebé mak tinan ida ho balun ona kontinua CNC hodi elabora matéria ida-ne’e.

“Ha’u hanoin ida-ne’e mós hatudu oinsá vontade hosi Ajénsia Internasionál sira atu kontinua apoia ita iha ita-nia prezervasaun memória pasada, maibé ita prezerva de’it laiha utilidade, entaun oinsá mak halo nia sai asesivel ita tenke integra iha kurrikulár ensinu,” nia dehan.

Hein katak, hosi semináriu ida-ne’e bele fó komentáriu tanba hanoin CNC hetan oportunidade atu elabora matéria ne’e, hosi unidade ensinu kurikulár ida-ne’e.

“Ha’u fiar katak orsida ho ita-boot sira-nia komentáriu bele hadi’a liután matéria ne’ebé CNC prepara,” nia hateten.

Diretora Jerál Ensinu Superiór Siénsia no Kultura (MESSK), Maria Filomena Lay, hateten ohin ne’e hanesan marka importante ida ba Timor-Leste liu-liu ba Ministériu Ensinu Superiór Siénsia no Kultura (MESSK) no Centro Nacional Chega, tanba Centro Nacional Chega hanesan Institusionál ida haree kona-ba istória rezisténsia Timor-Leste.

“Iha aspeitu ida ne’e, relasiona ho ita-nia kurrikulu padraun nasionál ne’ebé hato’o iha ne’ebá persentajen ba unidade haat kurikular baze, institusionál, profesionál no espesializasaun, ne’ebé hanoin katak istória ne’ebé Timor-Leste nian. Tanba, istória ein-jerál ita hotu hatene, istória ba ita-nia rain nian no iha mós relasaun ho istória universál sai hanesan parte importante ida,” nia dehan.

Iha ukun rasik an ne’e, nia dehan, TL ukun an tinan 20 ona ne’e tenke hanoin oinsá TL nia istória ne’ebé husik hela valór importante kona-ba kultura no moris loro-loron nian no mós kona-ba rezisténsia atu pasa ba jerasaun foun ne’ebé estuda hela iha eskola sira.

“MESSK iha ona kurríkulu nasionál ba ensinu superiór, politikamente ita hatuur ona iha unidade haat hanesan unidade institusionál haree liu ba buat ne’ebé relasiona ho instituisaun, entaun istória ne’e bele tama iha unidade institusionál, nune’e instituisaun mós iha nia hakarak atu hato’o hato’o mós istória, tanba instituisaun balun hanorin ona istória,” nia hateten.

Loloos ne’e, dezde dekretu-lei ba kurríkulu padraun nasionál hatuur ona, Governu liuhosi MESSK implementa ona maibé unidade istória foin mak MESSK ko’alia ho Instituisaun sira bele implementa iha tempu badak no tinan oin.

“Maibé labele haluha, UNITAL ohin hato’o ona katak sira iha istória, entaun ho sira iha ona, sira adapta de’it matéria ne’ebé CNC bele propoin no proposta, atu sira bele impelementa. Ida ne’e ha’u hanoin katak sai objetivu ita-nian atu oinsá transmite valor nasionál, valor kulturál no valor de vida ita ema timor ba jerasaun foun sira,” nia hateten.

Entretantu, iha semináriu ne’e reprezenta hosi Vice-Reitor no dosente sira iha Instituisaun Ensinu Superior sira, iha Timor-Leste.

CNC nia mandatu ida mak Prezerva Memória Pasada, halo memória ne’e asesivel ho intensaun harii edukasaun hodi respeita direitu umanu no mantein pás. Ida-ne’e mandatu tuir lei ne’ebé fó ba CNC no oportunidade ida-ne’e nu’udar dalan ida atu responde ba mandatu ida-ne’e,” Diretór Ezekutivu Centro Nacional Chega (CNC), Hugo Maria Fernandes, hateten liuhosi nia diskursu iha semináriu reere.

Jornalista : Nelia Fernandes

Editor      : Cancio Ximenes

iklan
iklan

Leave a Reply

iklan
error: Content is protected !!