KAPITÁL, NASIONÁL

PAM Dili orienta ekipa tékniku identifika baleta iha kapitál Dili

PAM Dili orienta ekipa tékniku identifika baleta iha kapitál Dili

Traballador sira hamoos hela tahu iha areadores no baleta iha Palacio Prezidente nia oin, hafoin udan horiseik halo mota maloa intupidu hodi bee no tahu tama hotu iha Palacio Prezidente nian.Imajen/Antonio Goncalves

DILI, 17 agostu 2022 (TATOLI)—Diretór Obra Públika Autoridade Munisípiu Dili (AMD), Sabino da Costa, informa Prezidente Autoridade Munisípiu (PAM) Dili, Guilhermina Filomena Saldanha Ribeiro “MARGI”, orienta ekipa tékniku hodi tun ba terenu atu identifika baleta ne’ebé foer iha kapitál Dili.

“Baleta iha Dili laran ida-idak mai ho nia orsamentu rasik. Hanesan Programa Mão de Obra Postu Administrativu (PMOPA) agora la’o dadaun, hanesan kada suku sira-nia osan iha atu hamoos baleta iha Dili laran sira. Agora identifikasaun ita-nia Prezidente orienta ami iha sesta-feira atu tun ba terenu hodi identifika baleta sira. Nune’e, sesta agora mak ami tun hahú fali iha Audian to’o Kuluhun, Becora, hafoin ami halo verifikasaun no identifikasaun atu bele submete problema saida mak akontese. Teknikamente ami sei halo levantamentu depois ami submete ba Prezidente Autoridade Munisípiu Dili,” Sabino da Costa informa ba jornalista Agênsia Tatoli iha nia kna’ar fatin, Díli, kuarta ne’e.

Atividade ne’ebé Dirasaun Obra Públika Autoridade Munisípiu Dili (AMD), halo ne’e atu identifika baleta sira iha Dili, tanba baleta sira iha Dili sai komplikadu boot ida, tanba ne’e ekipa prontu hodi tun ba halo verifikasaun.

“Finálmente última rezultadu ami tenke submete ba Nai Prezidente, depois nia solusaun iha leten mak foti dezisaun, tanba ami haree liu ba téknikamente,” nia esplika.

Maske nune’e, ba baleta sira iha kapitál Dili mosu ezijénsia barak, ne’ebé mai hosi Deputada sira iha uma fukun Parlamentu Nasionál (PN) no Komunidade.

“Ezizensia agora mai ho naba-naban de’it, hanesan Nai Deputada mós ezijensia no hosi ita-nia komunidade mós ezijénsia makaas, ne’ebé ami teknikamente prontu atu identifika no verifika ba fatin ne’ebé risku no ikus ami submete ba Prezidente Autoridade Munisípiu Dili,” nia dehan.

Entretantu, tuir observasaun jornalista Ajénsia Tatoli iha terenu nota katak, pesoál rekrutamentu ba Programa Mão de Obra Postu Administrativu (PMOPA) no limpeza sidade Dili hamoos ona baleta balun no baleta balun pesoal sei hamoos iha sidade dili, nune’e baleta sira sai moos no iha tempu udan labele intupidu.

Enkuantu, Programa Mão de Obra Postu Administrativu (PMOPA) ne’e Autoridade Munisípiu Dili (AMD) prevee orsamentu liuhosi orsamentu retifikativu hamutuk $572,704, hodi halo limpeza iha aldeia sidade dili.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!