COVID-19: kazu detetadu pozitivu nain-ualu no ativu 49
DILI,19 agostu 2022 (TATOLI)— Ministériu Saúde (MS), relata kazu detetadu pozitivu foun na’in-ualu, rekuperadu neen no kazu ativu 49.
“Ohin, kazu pozitivu foun na’in-ualu, rekuperadu neen, no ativu 49,” Diretora Jerál Prestasaun Saúde Odete da Silva Viegas liuhosi nota ne’ebé Agência TATOLI asesu, sesta ne’e.
Nune’e, hahú 21 marsu 2020 to’o 18 agostu 2022 iha kumulativu kazu konfirmadu 2.3108 no óbitu 135.
Hosi horisehik mai ohin, Laboratóriu Nasionál Saúde halo teste PCR 169 kompostu vijilánsia sentinela la iha , rastreiu ba kontaku 114, rastreiu aleatóriu haat, viájen internasionál 51 no follow up iha kuarentena laiha.
Alende ne’e, totál teste PCR ne’ebé halo iha 17 agostu 2022 iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 51, hanesan Maubisse laiha, Maliana neen, Viqueque laiha, Suai 10, Baucau laiha, Ermera laiha , RAEOA laiha, HNGV 35, Lautém laiha, Vera-Cruz laiha no Manufahi laiha.
Populasaun elijível tinan 18 ba leten, ne’ebé simu ona vasina to’o iha loron 18 agostu 2022 , tuir sistema informasaun Saúde iha Ministériu Saúde, hanesan kumulativu 1ª doze iha Dili (89,1%) no kumulativu 2ª doze iha Dili (85,2%)
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 87,6% no simu ona doze daruak 76,9%.
Hosi insidénsia COVID-19 iha Timor-Leste, durante loron hitu ikus maka 1,4/100 mil abitante.
Iha loron 18 agostu 2022 , izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu tolu , baixa ho COVID-19 tolu.
Notísia Relevante:COVID-19: pozitivu na’in-lima, rekuperadu 16 no ativu 47
Jornalista: Felicidade Ximenes
Editór : Florencio Miranda Ximenes
