DILI, 22 agostu 2022 (TATOLI)—Diretora Ezekutiva Programa Nasionál Dezenvolvimentu Suku (PNDS), Claudinha Soares Pinto, hateten konstrusaun Uma Kbiit Laek (UKL) ba tinan 2021 atinje ona 94%.
Notísia Relevante: Marsu 2021, Governu hahú konstrui uma 1.272 ba kbiit laek
Benefisiáriu ba Uma Kbiit Laek (UKL) tinan 2021 hamutuk 1,254 ne’e, ninia konstrusaun uma implementa hotu ona no hein atu konklui.
“Uma Kbiit Laek (UKL) tinan kotuk ne’e ita konta dehan atnje ona 94%. Ha’u seidauk iha dadus kuantidade benefisiáriu hosi 94% maibé ami garante implementa hotu ona no hein ita konklui de’it ona,” Diretora PNDS ne’e hateten ba Agência Tatoli, iha nia kna’ar fatin Colmera, Dili, segunda ne’e.
Nia hateten, PNDS hakarak atu taka tiha Sistema no entrega ba benefisiáriu sira, nune’e atu kontinua fali ho konstrusaun Uma Kbiit Laek (UKL) regulár ho Uma Kbiit Laek Plus (UKL+).
“Iha UKL 2021 barak mak konklui ona no ami hakarak entrega ona ba na’in para ami taka ona Sistema, nune’e ita haree fali UKL regulár no UKL plus ne’e,” nia dehan.
Benefisiáriu ba UKL ne’e hamutuk 1,254 ho nia osan millaun $25 ne’ebé mak aloka ba 424 no kustu ba kada Uma Kbiit Laek entre $14,000 no $17,000.
Notísia Relevante: MAE aprezenta planu “Uma Kbiit Laek Plus” ba Primeiru-Ministru
Jornalista : Osória Marques
Editór : Cancio Ximenes
