DILI, 22 agostu 2022 (TATOLI)—Ministériu Saúde hamutuk ho parseiru Menzies, segunda ne’e, halo lansamentu ba estudu prevalensia moras tuberkoluze iha Timor Leste.
Tinan ne’e, Ministériu saúde hamutuk ho Menzies sei hahú hala’o atividade peskiza ba moras tuberkoluze hahú husí munisípiu Dili no sei kobre hotu ba territóriu nasionál.
“Ema kuaze 20.000 mak sei envolve iha ita nia peskiza ida ne’e, nune’e ita buka para identifika sinál no sintoma balun atu halo screening ba sira hodi foti sira nia amostra, hafoin mai teste iha laboratóriu hodi hatene ema sira ne’e tuberkoluze ka lae ,”Diretór Nasionál Saúde Públika, Frederico Bosco, informa bainhira halo lansamentu ba estudu prevalensia moras tuberkuloze ihaTimor Leste iha sede suku Bairru-Pité.
Estudu prevalensia ne’e ho razaun tanba durante tinan barak nia laran Ministériu Saúde uza estimasaun, nune’e to’o ona tempu atu halo peskiza hodi bele fó ona númeru ezata ho númeru moras tuberkoluze iha Timor Leste.
Nune’e, Ministériu Saúde agradese ba parseiru Menzeis ne’ebé hetan apoia fundu husi Governu Austrália ba atividade estudu ne’ebé hahú ohin to’o fulan agostu tinan 2023 iha territóriu nasionál.
“Peskiza ida ne’e hanesan parte ida ne’ebé importante tebes hodi hatudu dalan ba ita halo detesaun sedu ba moras tubekoluze ida ne’e,” nia afirma.
Iha fatin hanesan, Responsavel ba Programa Tuberkoluze iha Menzies Timor Leste, Joshua Francis, hateten servisu hamutuk ho Ministériu Saúde atu kombate moras infesioza iha Timor leste.
“Moras tuberkoluze ne’ebé mak afeta ema barak iha Timor-Leste Tanba ne’e mak ami servisu hamutuk ho Ministériu Saúde hodi haree ba kazu tuberkoluze entaun peskiza ne’e ajuda ami atu hatene tuberkoluze nia kauza no nia númeru iha Timor Leste hodi suporta ema kiak atu bele halo tratamentu,” katak Joshua Francis
Jornalista : Felicidade Ximenes
Editór : Florencio Miranda Ximenes
