BCTL introdús prosesu pagamentu dijitál no koñese moeda iha Cailaco
BOBONARO, 26 agostu 2022 (TATOLI)-Banku Sentrál Timor-Leste (BCTL, sigla portugés) hamutuk ho instituisaun finanseira sira, sesta ne’e habelar informasaun hodi halo introdusaun kona-bá prosesu pagamentu dijitál no kampaña programa koñese ita-nia moeda, iha postu administrativu Cailaco, munisípiu Bobonaro.
Vise Governadór BCTL, Venancio Alves Maria, esplika, iha tinan 2019 ne’e BCTL lansa ona programa kampu dijitál iha postu administrativu Maubisse, munisípiu Ainaro no postu administrativu Baguia, munisípiu Baucau.
Iha tinan kotuk no foin lalais ne’e iha postu administrativu Uatulari no Uatucarabau, munisípiu Viqueues.
Nune’e mós postu administrativu Iliomar, munisípiu Lautem tanba iha implementasaun sistema ne’e komunidade sira seidauk toman nune’e hasoru obstákulu oinoin.
Programa ne’e Banku Sentrál Timor-Leste serbisu hamutuk instituisaun finanseira sira, ne’ebé integra ona iha Sistema P24 hanesan Banku Nasionál Ultramarinu (BNU), Telemor Mosan, Banku Mandiri, Banku Repúblika Indonézia (BRI) no seluk tán.
Notísia relevente: BCTL introdús pagamentu dijitál ba autoridade no funsionáriu iha Uatulari
“Objetivu programa pagamentu dijitál mak atu lori serbisu finanseiru bázika, liuliu pagamentu dijitál no pontu asesu finanseira bázika ba komunidade sira-ne’ebé iha área rurál hodi fasilita sira atu koñese saida maka pagamentu dijitál no fasilita sira pelumenus asesu uluk iha pagamentu iha pontu finanseiru sira-ne’ebé besik,” nia imforma ba Jornalista sira, iha salaun administrasaun postu Cailaco.
Enkuantu matéria ne’ebé introdús ba komunidade autoridade lokál sira kona-bá oinsá mak uza pagementu dijitál, adere ba karteira eleitrónika, asesu kartaun P24 no internet banking hodi asesu pagamentu ho llaais no fasil liu.
Prosesu pagamentu dijitál liu Sistema P24 integra tiha ona iha kompaña teknolojia finanseiru ho banku nesesidade, nune’e permite tranferénsia entre konta bankária ho karteira eletrónika, depois hosi karteira eleitrónika ba fali konta bankária efisiénsia no fasil liu.
Sistema ne’e mos la nesesáriu ba kliente sira tenke lori osan halai ba loja no instituisaun finanseira sira, maibé hala’oo de’it tranzaksaun bankária uza telemovel.
BCTL mós fahe informasaun ba komunidade sira atu koñese osan orijinál no falsu.
“Aban banirua iha ema ruma ne’ebé tenta atu halo sirkulasaun osan falsu iha sira-nia leet, sira bele koñese no identifika hodi prevene, karik hetan informa ba autoridade relevante,” Vise Governadór BCTL ne’e fó hanoin ba abitante sira iha Cailaco.
Administeradór postu administrativu Cailaco, Alfredo Meta-Dau, kontente no agardese ba BCTL no instituisaun finanseira sira no konsidera atividade ne’e bele fasilita komunidade sira bele aplika sitema moderna.
“Sistema pagamentu dijitál hanesan dalan úniku ida-ne’ebé ita tenke liu, ita sorte tanba BCTL bele mai fahe informasaun tanba postu sira seluk seidauk akontese, maibé ita (Cailaco) akontese ona,” nia apela.
Entretantu partisipa iha atividade ne’e mai hosi xefe suku na’in-ualu, komunidade sira, autoridade seguransa hamutuk na’in-100.
Notisia relevante: BCTL husu públiku hadook-an hosi eskema hahalok bosok
Joranlista: Sérgio da Cruz
Editór: Evaristo Soares Martins
